Aqyn, jýrnalist, «Nevada-Semei» qozǵalysynyń ardageri Arman Qanidiń "Sýretshi Káripbek" atty óleńin nazarlaryńyzǵa usynamyz. Taǵdyr talaiyna túsken sýretshiniń aýyr háli oqyrman kóńiline oi salary anyq.
Sýretshi Káripbek
Balqan taýda, jaqpar tastyń janyna
Qaita kelip jalǵyz ózi taǵy da,
Týmysynan qos qoly joq sýretshi
Qulaq túrdi jetim tyrna zaryna.
Qaraýytqan qara barqyn qyrqadan
Syrǵydy tún súrleýlermen myń taram.
Qoimaljyńdaý qońyr nuryn ińirdiń
Sapyrady tisindegi qylqalam.
Qan josa bop qubyla jaq kógildir,
Óksip turdy ai tańbaly ómir bir.
Qylqalamǵa qyzyl qany shashyrap
Kúni batty kúreńitken óńirdiń.
Biraq, mynaý tasqa bitken sýretten
Kúrkireidi kók nóserli bir kóktem.
Kókireginde kókshe jasyn shyrqyrap
Kóshedi bult kókpar tartyp dúrmekpen.
Aq mamyq nur aidarynan úlpildep
Qara aǵash ta búrshik jardy birtindep.
Sýret emes, qainap jatqan ómir bul
Tas qazanda myń boiaýmen búlkildep!
Sýretshiniń kózi jainap kúlgende,
Jaltyldap ol qara káýsar nurmen de,
Syńar tamshy kóz jasynan móp-móldir
Boiaý túsi ózgeredi bir demde.
Tulymyna qyzyl-jasyl gúl bailap
Saryózekte sándengende surqai baq.
Qalqyp shyqty Hirosima boiaýy
Tas qazanda kóleńke men kúl qainap…
Sýrettegi ai mańdaily álemdi
Qylqalammen sipap…
Oiǵa bólendi.
Tas betinde aqiqatty tiriltip,
Jaýyzdyqty jazalamaq ol endi!
Úkim oqý qazir onyń yrqynda,
Jai oinaǵan Balqan taýdyń syrtynda
Jańbyrlatyp jalǵyz ushyp barady
Qos qanatyn ot sharpyǵan bir tyrna…
Arman QANI
