Qazaqstan Respýblikasynyń Tuńǵysh Prezidenti kúni qarsańynda elordada «Nursultan Nazarbaev: jahandyq aýqymdaǵy saiasatker» halyqaralyq konferentsiiasy ótti. Sharany QR Prezidenti janyndaǵy Qazaqstannyń strategiialyq zertteýler institýty Syrtqy ister ministrligimen birlesip uiymdastyrdy, - dep habarlaidy Qazaqstan Respýblikasy Prezidenti janyndaǵy Ortalyq kommýnikatsiialar qyzmeti.
Kezdesý aralas formatta ótti. Qazaqstandyq sarapshylarmen ártúrli jyldary álemdik derjavalardyń memleketteri men úkimetterin basqarǵan, halyqaralyq uiymdarda joǵary laýazymdardy atqarǵan jáne atqaryp júrgen belgili saiasatkerler shet memleketterden bailanysqa shyqty. Olardyń barlyǵy bir kezderi Nursultan Nazarbaevpen tyǵyz jumys istedi jáne eń órshil ideialardy júzege asyrýdyń kýágeri boldy.
«Jahandyq aýqymdaǵy saiasatker» - Memleket basshysy Qasym-Jomart Toqaev óziniń «On delaet istoriiý» atty kitabynda Qazaqstan Respýblikasynyń Tuńǵysh Prezidenti-Elbasynyń memlekettiń qalyptasýy men nyǵaiýyndaǵy kórnekti rólin atap ótip, Nursultan Nazarbaevty osylai ataidy.
Qatysýshylar óz sózderinde Tuńǵysh Prezidenttiń Qazaqstan egemendiginiń qalyptasýyndaǵy, memlekettik basqarýdyń tiimdi júiesin qurýdaǵy jáne ulttyq tarihtyń jańa kezeńinde eldiń damý basymdyqtaryn aiqyndaýdaǵy róli men mańyzyn atap ótti. Spikerlerdiń aitýynsha, tarihi ólshem boiynsha qysqa merzim ishinde Nursultan Nazarbaev áleýmettik jáne ekonomikalyq turaqtylyqqa negizdelgen tabysty memleket quryp qana qoimai, jahandyq qaýipsizdik pen damý salasynda birqatar serpindi bastamalar kóterdi. Halyqaralyq konferentsiiaǵa qatysýshylar sondai-aq Elbasynyń Qazaqstannyń halyqaralyq bailanystaryn jolǵa qoiý, kópvektorly syrtqy saiasattyń strategiialyq baǵytyn qurý jónindegi kúsh-jigeri men jetistikterin, syrtqy saiasi bastamalardy, olardyń iske asyrylý barysy men qorytyndylaryn talqylady.
Nursultan Nazarbaevtyń órkenietaralyq jáne konfessiiaaralyq dialogty nyǵaitý, beibitshilik pen kelisimniń, jastyqtyń, sulýlyqtyń, kreativtiliktiń simvolyna ainalǵan Qazaqstannyń qazirgi zamanǵy astanasyn Eýraziia ortalyǵynda salý jónindegi jasampaz missiiasyna erekshe nazar aýdaryldy.
