Nursultan Nazarbaev halyqaralyq áýejaiynyń jańa kody iske qosyldy, dep habarlaidy QazAqparat.
Barlyq brondaý júielerinde, otyrǵyzý talondarynda, bagaj birkalarynda jáne aqparattyq tabloda jańa NQZ kody engizildi.
«Áýejai kodyn aýystyrý jumystary 2014 jyldan beri júrgizildi. IATA uiymynyń negizgi talaby - áýejailarǵa bir ret turaqty kod berý edi. Qazaqstandyq áýe tasymaldaýshylarmen úlken kelissózder júrgizildi. Nur-Sultanǵa jolaýshylar tasymaldaityn barlyq áýe kompaniialary bul usynysty qoldady. Birlesken kúsh-jiger arqyly ótken jyly sheshim qabyldandy. Alǵashynda Nur-Sultan qalasynyń kodyn ózgertýge áreket ettik. Keiin tutas IATA mehanizmin ózgertýge kúsh saldyq. Óitkeni, Qazaqstan ǵana emes, birneshe TMD elderi kod ózgertýge suranys bildirýde. Uzaq jyldar boiy kodyn ózgerte almai júrgen qalalar bar. Sondyqtan, tutas IATA qararyn ózgertý bastamasyn usyndyq», - dedi QR IIDM Azamattyq aviatsiia komitetiniń tóraǵasy Talǵat Lastaev áýejaidaǵy resmi tanystyrylymda.
Spikerdiń aitýynsha, munda da birneshe jumys kezeń-kezeńimen atqaryldy.
«Arnaiy algoritm boiynsha ótinimdi aldymen IATA qaraidy. Odan keiin uiym quramyna kiretin áýe tasymaldaýshylar qarastyrady. Barlyǵy maquldap, kelisim berdi. Sheshim birneshe ai buryn bekitilip, habarlama jiberildi. Al búgin resmi engizildi. 8 maýsymnan bastap barlyq brondaý júielerinde, otyrǵyzý talondarynda, bagaj birkalarynda jáne aqparattyq tabloda jańa NQZ kody kórsetiledi», - dedi T. Lastaev.
