1 tamyz kúni ótken Atyraý oblysy ákimdigi májilisiniń otyrysynda kásipkerlikti jáne aýylsharýashylyq basqarmasy memlekettik qoldaý arqyly qurylǵan sharýashylyqtarda qansha jumys orny ashyldy degen suraqqa jaýap bere almady.
Saýalyna jaýap ala almaǵan aimaq basshysy basqarmalar arasynda bailanystyń joqtyǵyn aityp, qaramaǵyndaǵylardy sókti.
- Ashylǵan jumys orny týraly aqparatty bárińiz bilip otyrýyńyz kerek, - dedi ákim. – Jaýapkershilikten qashyp, jumystaryńyzdyń aiasyn shektep otyrsyzdar. Árbir basqarma bólek álemde ómir súrip jatqandai. Biýdjetten bólingen aqshanyń basty maqsaty – jumys oryndaryn ashý. Kásipkerlik basqarmasy aqshanyń qalai jumsalyp jatqanyn bilmese, jumys ornymen qamtý basqarmasy qansha jumys ornynyń ashylyp jatqanyn bilmese, aýyl sharýashylyq basqarmasy óz aldyna habarsyz bolsa, ne úshin jumys istep jatyrmyz? Bizdiń maqsatymyz aqsha bólý emes, jumys ornyn ashý, ekonomikany damytý. Bólingen aqshanyń qalai paidalanylyp jatqanyn qadaǵalaý kerek. Basqarmalar arasynda bailanys bolsyn, - dedi Nurlan Noǵaev.
Aimaq basshysy, aitylǵandardy eskere otyryp, ashylǵan jobalardyń jumysyn jiti baqylap otyrýdy tapsyrdy. Sonymen qatar, basqarmalar arasynda tyǵyz bailanystyń bolýyn qadap eskertti.
Aita ketelik, sońǵy 4 jylda Atyraý oblysynda Aýyl sharýashylyǵyn qarjylai qoldaý qory arqyly jergilikti biýdjetten 807 million teńge bólindi. Bul qarjy sharýalarǵa jyldyq mólsherlemesi 7 paiyz bolatyn qaitarymdy nesie túrinde berildi. Nátijesinde qazir 163 joba maquldanyp otyr.
"Ult aqparat"
