Atyraý oblysynyń ákimi Nurlan Noǵaev bilim berý salasynyń qyzmetkerlerimen keńes ótkizip, bilim berý obektileriniń jańa oqý jylyna daiyndyǵy máselesin qarady.
Jańa oqý jylyna daiyndyq týraly oblystyq bilim berý basqarmasynyń basshysy Qaiyrǵali Kenjeǵaliev baiandady.
-Oblystyń oqý oryndaryn aǵymdaǵy jóndeý úshin biýdjetten 328,2 mln. teńge bólindi. 2 mlrd teńgeden astam qarjy 18 oqý ornyn kúrdeli jóndeýge jumsaldy. Kúrdeli jóndeý júrgizilip jatqan barlyq mektepterde jumystar 1 qyrkúiekke deiin aiaqtalýy tiis. Sonymen birge búgingi kúni 30 oqý ornynyń qurylysy júrgizilýde. 8 mektep jáne 14 balabaqshany aǵymdaǵy jyldyń aiaǵyna deiin paidalanýǵa berý josparlanýda, - dedi Qaiyrǵali Kenjeǵaliev.
Mektepterdiń oqý jylyna júz paiyz daiyndyǵyn oblystyq Qoǵamdyq densaýlyq saqtaý departamentiniń basshysy Temirbek Musaǵaliev joqqa shyǵardy.
-Qalada apatty jaǵdaiǵa jaqyn kúidegi mektepter de bar. Olardyń jai-kúii jaqsy deýge kelmeidi, jasaityn jumystar jeterlik. Jóndeýdi qajet etetin basqa da bilim berý obektileri bar, - dep málimdedi Temirbek Musaǵaliev.
Óńir basshysy mektepter direktorlary men bilim berý basqarmasy basshysynyń jaýaptaryn tyńdap, oǵan problemalyq mektepter týraly barlyq aqparatty usynýdy tapsyrdy.
-Bilim berý basqarmasy basshysynyń baiandamasynda bul málimetter nege joq? Biz problemany taýyp, ony sheshýimiz qajet, barlyǵy jaqsy degen túr tanytyp, bir birimizden jasyrýdyń keregi joq. Eger oqýshylardy qabyldaýǵa daiyn emes mektepter bolsa, jedel túrde bul máseleni sheshý qajet. Qala ákimi men oblys ákiminiń jetekshilik etetin orynbasaryna osy mektepterdi tekserýdi jáne qysqa merzimde usynys berýdi tapsyramyn, - dedi Nurlan Noǵaev. – Barlyq áleýmettik obektiler erekshe baqylaýda bolýy qajet. Barlyq deńgeidegi ákimder, bilim berý salasynyń qyzmetkerleri mektepterdiń jańa oqý jylyna daiyndyq protsesin ózderi baqylaýǵa mindetti.
Keńeste aǵymdaǵy jyly oqýlyqtarmen jáne oqý-ádistemelik quraldarmen qamtamasyz etýde problema bolmaityny aityldy. Jergilikti biýdjetten 2,5 mlrd teńgeden astam qarajat qajetti oqý materialdaryn satyp alýǵa bólindi.
- Maǵan ata-analardan shaǵymdar túsýde, olar oqý oryndarynda túrli gadjetterdi, oiyn quraldaryn, qajetsiz oqý quraldaryn, kúmándi qyzmetterdi satýdy toqtatýdy suraidy. Eger mektep ákimshiligi munyń qajettiligi bar dep eseptese – muny ata-analar jinalystarynda, qamqorlyq keńesterinde usynyńyzdar. Bulardy balalarǵa satýdyń qajeti joq. Mektep – saýda orny emes, oqý ordasy. Bul tájiribeni toqtatý qajet. Jaýapty tulǵalar muny baqylaýǵa alady, - dep basa aitty Nurlan Noǵaev.
Óńir basshysy atap ótkendei, bilim berý salasy qoǵam aldynda úlken jaýapkershilik alady. Oqý ornyn bitirýshi qandai bilim alsa, bolashaqta ol qoǵam úshin sondai úles qosary anyq.
- Memleket basshysy qoǵamnyń aldyna úlken maqsattar qoiyp otyr. Olarǵa jetý úshin elimizge kásibi, bilimdi kadrlar qajet. Al bul sizderdiń jumystaryńyz, sizdiń tikelei mindetińiz. Eger siz bolmasańyz munymen kim ainalysady? Pedagogtardy barlyq ýaqytta da úlgi etedi, sizder bolashaq urpaqty tárbielep otyrsyzdar. Biz barlyq qajetti jaǵdailardy jasaimyz, barlyq qajetti qarjyny bólemiz. Sizderdiń mindetterińiz – balalarǵa barlyq jaqsyny berý, - dep sózin qorytyndylady Nurlan Noǵaev.
