Foto: UQK baspasóz qyzmeti
Pavlodar qalasyndaǵy sot oblystyq Politsiia departamentiniń burynǵy bastyǵy Nurlan Másimovke qatysty eki ákimshilik is boiynsha sheshim shyǵardy, - dep habarlaidy Massaget.kz portaly sottyń baspasóz qyzmetine silteme jasap.
"Pavlodar qalasynyń ákimshilik quqyqbuzýshylyq jónindegi mamandandyrylǵan sotynda Pavlodar oblysy Politsiia departamentiniń burynǵy bastyǵyna qatysty Ákimshilik quqyqbuzýshylyq týraly kodekstiń 234-1-baby boiynsha biýdjet qarajatyn tiimsiz josparlaǵany jáne paidalanǵany úshin eki is qaraldy.
Sot Politsiia departamenti biýdjetin josparlaý kezinde qyzmettik janýarlarǵa jem satyp alý kezinde zattai normalardy asyra baǵalaýdan kórinetin zańnama buzylǵanyn anyqtady", - delingen habarlamada.
Sot málimetinshe, 2021 jyly qyzmettik mal azyǵyn satyp alýǵa 60 872 100 teńge somasynda qarajat bólingen. Alaida Politsiia departamenti normalardy buzyp, 10 693 000 teńge somasyna 18 bas jylqyǵa jem alyp, normadan tys josparlaǵan.
"2022 jyly qyzmettik janýarlarǵa jem satyp alýǵa 13 394 000 teńge somasynda qarajat bólindi. Politsiia departamenti normalardy buzyp, 18 bas jylqyǵa 8 503 400 teńgege jem satyp alý normasyn asyra josparlaǵan. Tiimsiz josparlaý biýdjet qarajatyn asyra paidalanýǵa ákep soqqan.
Politsiia departamentiniń burynǵy bastyǵynyń kinási ákimshilik quqyqbuzýshylyq týraly hattamalarmen, aýditorlyq eseptermen, tekserý komissiiasynyń materialdarymen, aiǵaqtarmen jáne sot zerttegen basqa da derektermen dáleldenedi", - dep tolyqtyrdy baspasóz qyzmeti.
Nurlan Másimovke ár is boiynsha 214 410 teńge kóleminde ákimshilik aiyppul túrinde jaza taǵaiyndaldy.
Sondai-aq, sot ákimshilik quqyqbuzýshylyq týraly hattama jasaý kezinde is júrgizý normalaryn buzǵany úshin "Pavlodar oblysy boiynsha tekserý komissiiasy" MM atyna jeke qaýly shyǵardy.
Eske salaiyq, 2022 jylǵy qańtarda Nurlan Másimov Pavlodar oblysynyń politsiia bastyǵy qyzmetinen bosatyldy. Ol departamentti 2019 jylǵy qarashadan bastap basqarǵan.
Ótken jyldyń sáýirinde Nurlan Másimovtiń izdeýde ekeni belgili boldy. Keiinirek Sybailas jemqorlyqqa qarsy qyzmet onyń ornalasqan jeri týraly aqparat úshin syiaqy jariialady. Shildede ol Resei shekarasynda jalǵan qujattarmen ustaldy.
