Foto: IIM
Shymkentte 21 jastaǵy stýdent Nurai Serikbaidyń ólimine kúdikti psihikalyq ortalyqqa aýystyrylǵan. Marqumnyń týystary sheshimge kúmán keltirip, kúdiktiniń “jyndy” dep tanylýy jazadan qutylýdyń amaly bolýy múmkin ekenin aitady, dep habarlaidy Ult.kz Informbiýro baǵdarlamasyna silteme jasap.
Nurai Serikbaidy aiýandyqpen óltirdi degen kúdikti psihikalyq ortalyqqa jatqyzyldy. Bul týraly marqumnyń jaqyndary málimdedi. Olar sap-saý adamnyń aiaq asty jyndy bolyp qalýy jazadan sytylyp ketýdiń amaly dep topshylaidy.
Marqum Nuraidyń aǵasy Sultan Serikbai meditsinalyq anyqtama bergen dárigerlerdi tekserý kerek dep talap etti.
"Birinshisi Shymkentte qaralǵan edi. Sondaǵy anyqtamada psihikalyq aýytqýy baiqalǵan dep jazyp bergen. Biz oǵan senbei, Almatyǵa saraptama talap ettik, ol jaqqa bardy kúdikti, ol jaqta da osyndai anyqtama berdi. Endi bul jerde simýliatsiianyń maksimaldy belgileri kórinip tur. Óitkeni qylmysker kádimgi ortada ómir súrip júrgen adam, kádimgi saý adam. Estigenim boiynsha qazir qylmysker Shymkent qalasynda emes. Ol Talǵardaǵy psihikalyq emdeý ortalyǵynda", – dedi Sultan Serikbai.
Ázirge quzyrly organ ókilderi osy jaitqa qatysty resmi aqparat taratqan joq.
Eske salaiyq, qańtar aiynda Shymkentte 21 jastaǵy stýdentti jas jigit asqan qatigezdikpen pyshaqtap óltirgen edi. Nurai Serikbai oqiǵa ornynda til tartpai ketti. Kúdikti kózi tirisinde qyzdyń qyr sońynan qalmai, tipti alyp qashqany da anyqtalǵan. Politsiia adam óltirý men stalking baptary boiynsha qylmystyq is qozǵap, tergeý júrgizip jatyr. Alaida araǵa úsh ai salyp 28 jastaǵy jigittiń ýaqytsha ustaý izoliatorynan Talǵardaǵy psihikalyq ortalyqqa aýystyrylǵanyn marqumnyń týystary túsinbei otyr.
