Nurai Serikbaidy óltirý isi boiynsha tergeýshiniń áreketine sotta kúmán keltirilgen. Shymkent qalasynyń politsiia departamenti bul derek boiynsha qylmystyq is qozǵalǵanyn málimdedi, dep habarlaidy Centralmedia24.
Buǵan deiin sot otyrysynda qaza tapqan Nurai Serikbaidyń aǵasy Sultan Serikbai tergeýshi Ábilǵazy Artyqbaidyń is júrgizýine qatysty birqatar málimet aitqan.
Onyń sózinshe, tergeýshi Nuraidy alyp qashý jáne turmysqa shyǵýǵa májbúrleý faktisi boiynsha shaqyrtýǵa kelgen kezde Sherhan Aimahannyń týystarymen birge dastarhan basynda otyryp, shai iship, baýyrsaq jegen. Sondai-aq Sultan Serikbai tergeýshi marqum ápkesine qysym kórsetkenin aitqan.
Sotta tergeýshiniń ózi jaýap bergen kezde sýdia onyń Nurai Serikbaidy politsiia bólimshesinde videoǵa túsirgenine nazar aýdarǵan.
Sot málimetinshe, Ábilǵazy Artyqbai bul túsirilimdi hattamaǵa engizbegen jáne qyzdan jazbasha ruqsat almaǵan.
Osyǵan bailanysty Shymkent qalasynyń politsiia departamenti atalǵan fakti boiynsha qylmystyq is qozǵalǵanyn rastady.
«Tergeý amaldary jalǵasyp jatyr. Qazaqstan Respýblikasy Qylmystyq-protsestik kodeksiniń 201-baby talaptaryna sáikes, tergeý múddesine bailanysty ózge málimetter jariia etilmeidi», – dep habarlady politsiia departamenti redaktsiia saýalyna bergen jaýabynda.
Sotta Ábilǵazy Artyqbai qazirgi ýaqytta tergeýshi bolyp jumys istemeitinin aitqan.
Nurai Serikbaidyń ólimi
Buǵan deiin sot Sherhan Aimahandy úsh epizod boiynsha kináli dep tanyǵan. Olar:
- QR QK 125-1-baby — «Nekege turýǵa májbúrleý»;
- QR QK 115-1-baby — «Stalking»;
- QR QK 99-baby 2-bóliginiń 5-tarmaǵy — «Asa qatygezdikpen jasalǵan adam óltirý».
Sot úkimimen oǵan jiyntyǵynda 200 saǵat qoǵamdyq jumys jáne ómir boiyna bas bostandyǵynan aiyrý jazasy taǵaiyndaldy.
Qaiǵyly oqiǵa 2026 jylǵy 12 qańtarda Shymkentte bolǵan. Nurai Serikbai pyshaq jaraqatynan kóz jumdy. Týystarynyń aitýynsha, Sherhan Aimahan qyzdy uzaq ýaqyt boiy ańdyǵan.
2026 jylǵy 30 sáýirde saraptama qorytyndysy boiynsha Sherhan Aimahan esi durys dep tanylǵan.
