Elorda ákimdigi «Máńgilik el» saltanat qaqpasyna kúrdeli jóndeý jumystaryn júrgizýdi josparlap otyr, dep habarlaidy QazAqparat tilshisi.
«Saltanat qaqpasyndaǵy jaǵdai kóńil kónshitpeidi. Jer asty arqyly ótpe joldyń týnneldik bóligin salý barysynda jumys sapasyz júrgizilgen. Jyl saiyn júrgiziletin jóndeý jumystary kemshilikterdi eńserýge múmkindik bermeidi. Boljam boiynsha, kúrdeli jóndeý jumystaryna shamamen 600 mln teńge kerek», - dedi qala ákiminiń orynbasary Nurlan Nurkenov elordalyq máslihattyń sessiiasynda.
Óz kezeginde máslihat depýtaty Sergei Solodovnikov qaqpa Qazaqstan Táýelsizdiginiń 20 jyldyǵyna orai 2011 jyly ashylǵanyn atap ótti.
«Qalalyqtar men shahar qonaqtary saltanat qaqpasyna erekshe qyzyǵatyndyqtan, 2015-2016 jyldary joǵarǵy qabattaǵy mýzeige jóndeý júrgizilgen bolatyn. Alaida jer asty ótpe joldyń týnneldik bóliginiń qurylysy kezinde qurylys jumystary sapasyz júrgizilgen. Atap aitqanda, nashar gidroizoliatsiia, qaqpa aýmaǵynyń jol bóligine sapasyz janasýy, jol jabyndylary sharttarynyń saqtalmaýynyń salldarynan jer asty jolyna sý tolyp ketedi», - deidi Sergei Solodovnikov.
Depýtat óz sózinde jyl saiyn júrgiziletin jóndeý jumystary atalǵan kemshilikterdi joiýǵa kómektespei turǵanyn, al 2019 jylǵy kóktemgi jańbyr bul máseleni tipti ýshyqtyryp turǵanyn aityp ótti.
