Nur-Sultan qalasyndaǵy ǵimarattar normativten eki ese kóp energiia tutynady. Bul týraly jylýmen qamtý sektorynda balamaly qýat kózderiniń úlesin arttyrý máselesine bailanysty elordada ótken kosýltativti sessiiada BUU Damý baǵdarlamasy jobalarynyń menedjeri Aleksandr Belyi málim etti, dep habarlaidy QazAqparat.
«Energiia tiimdiligine qol jetkizý úshin turǵyn úi qunyn qanshalyqty kóterýge bolatynyna taldaý jasalǵan bolatyn. Ońtaily boljam aiqyndaldy: baspana 10 paiyzǵa qymbattasa, shamamen 30-40 paiyzdyq energiiany únemdeýge bolar edi. Qaraǵandy qalasynda turǵyn úi maqsatynda 9 qabatty ǵimarat turǵyzyldy. Onda alǵash ret jylýdy qalpyna keltirý júieleri qoldanyldy. Qazaqstanda bul júielerge qatysty belgili bir qiyndyqtar bar. Sondai-aq, osy joba aiasynda elordadaǵy 50 ǵimarattan synama alyndy, olardyń energiia tutyný deńgeii taldandy», - dedi Aleksandar Belyi.
Onyń aitýynsha, 2010 jyldan keiin elordada salynǵan ǵimarattardyń 25 paiyzy energiia tiimdiliginiń minimaldy satysyna da sai kelmeidi.
Aleksandr Belyi, sonymen birge Nur-Sultandaǵy ǵimarattar orta eseppen Qazaqstanda bekitilgen normativterden eki ese kóp energiia tutynatynyn atap ótti. Onyń aitýynsha, turǵyn úidiń 1 sharshy metrine salynǵan 8 dollar - energiiany 9 paiyz únemdeýge, sharshy metrine salynǵan 50 dollar - 41 paiyz únemdeýge múmkindik beredi.
BUU DB menedjeri atap ótkendei, ortalyqtandyrylǵan jylýmen qamtý aýmaǵynda shaǵyn jańǵyrtylatyn energiia kózderiniń, mysaly, kún panelderiniń paidasy joq. Menedjerdiń aitýynsha, Nur-Sultandaǵy jylý energiiasy qunynyń tómendigi sonshalyq, jańa úilerdiń turǵyndary ǵimarattyń jylý júiesin jańǵyrtýǵa qyzyǵýshylyq tanytpaidy.
