Nur-Sultanda ústine metall qurylym qulap, qaza tapqan áieldiń balalary qazaqstandyqtarǵa úndeý jasady, - dep habarlaidy Tengrinews.kz tilshisi.
"Biz anamyzdan aiyryldyq. Onyń aty-jóni Ahmetjanova Gaýhar Sákenqyzy. Ol 56 jasta edi. Eń jaqyn adamnan - anadan aiyrylý qandai ekenin sózben aityp sipattaý múmkin emes. Anam inim ekeýmizdi tárbielep, ósirý úshin eki jerde jumys istedi. Sabyrly, salmaqty, meiirimdi edi. Anam Qazaq bas sáýlet-qurylys akademiiasyn bitirgen, 1986 jylǵy jeltoqsan oqiǵasyna qatysqan, Qazaqstan Sáýletshiler odaǵynyń múshesi bolǵan. Ol elordanyń turǵyn úi keshenderi men qurylymdarynyń jobalyq jáne jumys jobalaryn ázirleýmen ainalysqan", - deidi marqumnyń qyzy Juldyz Tursynbekova.
Marqumǵa bes ota jasalǵan. 2021 jyly 14 jeltoqsanda Gaýhar Ahmetjanova qaitys boldy. Nur-Sultan qalasynyń Politsiia departamentinde QK-niń 306-baby "Qaýipsizdik talaptaryna sai kelmeitin taýarlardy shyǵarý nemese satý, jumystardy oryndaý ne qyzmetterdi kórsetý" boiynsha qylmystyq is qozǵaldy.
"Anamnyń ómiri óreskel zańbuzýshylyqtarǵa bailanysty úzildi. Inim ekeýmiz jalǵyz qaldyq. Kináliler tipti qońyraý da shalmady, kem degende keshirim suraýǵa kelmedi. Eki aiǵa jýyq ómir úshin kúres kináliler tarapynan beijai ótti. Bizge kómek kerek pe dep eshkim suramady", - dep qorytyndylady qyz.
Ol Elbasy Nursultan Nazarbaevqa, Qazaqstan Prezidenti Qasym-Jomart Toqaevqa, Bas prokýrorǵa, ishki ister ministrine, Joǵarǵy Sot tóraǵasyna qaiǵyly jaǵdaiǵa nazar aýdarýdy ótindi.
Qyz Nur-Sultan qalasynyń Politsiia departamentinen anasynyń qaza bolý sebepterin tergeýde tabandylyq tanytýyn surady.
