Elordada №300 baǵyttaǵy ekspress-avtobýs pen jeńil kólik soqtyǵysty, dep habarlaidy QazAqparat tilshisi.
«№300 avtobýs Qorǵaljyń tasjolymen qalaǵa qarai kele jatqan. Onymen bir baǵytta qozǵalǵan «Sýbarý» markaly avtokólik avtobýsty basyp ozyp, kenet jolaýshylar kóliginiń aldyna toqtai qalǵan. Aqyry avtobýs jeńil avtokóliktiń artyna soǵylǵan», - dep habarlady «Astana LRT» kompaniiasynan.
Kompaniiadan málim etkendei, jol-kólik oqiǵasynan zardap shekkender joq.
«Eshkim zardap shekken joq. №300 avtobýstyń júrgizýshisine qatysty hattama toltyryldy. Ol AP1 (Avtobýs parki) basshylyǵynyń sheshimi boiynsha, jumystan shettetilip, Biliktilik ortalyǵyna qaita oqýǵa jiberiledi», - delingen habarlamada.
Avtobýs júrgizýshisiniń 13 jyldyq eńbek ótili bolǵan. On jyldan beri №1 avtoparkte eńbek etedi.
Eske sala ketsek, osydan birneshe kún buryn elordada úlken jol-kólik apaty boldy. Qala mańyna qatynaityn júrdek avtobýs qatty jyldamdyqpen baǵdarshamda turǵan avtobýsqa soǵyldy. №301 baǵdardyń júrgizýshisi jáne aldyńǵy orynda otyrǵan bir jolaýshy oqiǵa ornynda kóz jumdy.
Jol apatynan 36 adam jaraqat aldy. Bir áieldiń aiaǵy ampýtatsiialandy.
Al keshe QR Ishki ister ministri Erlan Turǵymbaev atalmysh jol apaty boiynsha tergeýdiń barysy týraly aitty.
«Sotqa deiingi meditsinalyq saraptama júrgizilip jatyr. Barlyqtaryńyz da «Sergek» kameralarynyń arqasynda avtobýstyń qalai soǵylǵanyn kórdińizder. Eger tejegishi isten shyqsa, júrgizýshi apatty boldyrmaýdyń ózge sharalaryn qabyldaityn edi. Meditsinalyq saraptama júrgizilip jatyr. Ol júrgizýshi óliminiń sebebin kórsetip beredi», - dedi ministr Úkimet otyrysynan keiin BAQ ókilderine bergen suhbatynda.
Sonymen qatar ol avtobýsqa da tehnikalyq saraptama júrgizilip jatqanyn aitty. «Avtobýstyń aldyńǵy bóliginiń talqany shyqqan. Menińshe, bir aidyń ishinde jaýabyn beremiz», - dedi E.Turǵymbaev.
