kollaj: Tengrinews.kz
Elorda turǵyndary jasóspirim qyzǵa tiisken er adamǵa shaǵymdandy. Qalalyq politsiia departamenti bul jaitqa qatysty pikir bildirdi dep jazady KAZ.NUR.KZ.
Bolǵan oqiǵa týraly kris.p.astana Instagram paraqshasynda habarlandy.
Jazba avtorynyń sózinshe, beitanys er adam keshki ýaqytta qyz balany belgisiz baǵytqa qarai alyp ketpek bolǵan. Al qyz bala kómek surai bastaǵan. Sol kezde er adam qashyp ketken kórinedi.
Kýágerlerdiń aitýynsha, sodan keiin jergilikti turǵyndar ony qýyp jetip, politsiia shaqyryp, tártip saqshylary kelgenshe ustap turǵan.
Bul faktini Nur-Sultan qalasynyń politsiia departamenti rastap otyr.
Vedomstvonyń málimetinshe, 21 qyrkúiek kúni saǵat 19:21-de Rysqulbekov kóshesinde er adamnyń qyz balaǵa tiiskeni týraly aqparat túsken.
"Oqiǵa ornyna tez arada politsiia qyzmetkerleri jiberildi. Keshki ýaqytta mektepten qaityp kele jatqan kámelet jasyna tolmaǵan qyzǵa mas kúidegi er adamnyń jaqyndaǵany anyqtaldy.
Atalǵan fakti boiynsha 25 jastaǵy kúdikti ustaldy. Meditsinalyq tekseristen keiin onyń ortasha dárejede mas kúide bolǵany anyqtaldy. Ishki ister organdarynda esepte turmaidy, buǵan deiin qylmystyq jaýapkershilikke tartylǵan.
Qazirgi ýaqytta tergeýge deiingi tekseris júrgizilýde, nátijesi boiynsha protsessýaldyq sheshim qabyldanady", - deidi Nur-Sultan qalasy politsiia departamentiniń baspasóz qyzmetinen.
