Nur-Sultan qalasynyń turǵyndaryna biylǵy jylytý maýsymynda 300 myń tonna kómir qajet. Ázirge onyń 56 paiyzy tuiyqtarǵa jetkizilgen, dep habarlaidy QazAqparat.
Bul týraly ortalyq kommýnikatsiialar qyzmetinde ótken brifingide QR Indýstriia jáne infraqurylymdyq damý ministrliginiń indýstriialyq damý komiteti qara metallýrgiia basqarmasynyń basshysy Janat Igisinov aitty.
«Nur-Sultan qalasy boiynsha biyl halyqqa 300 myń tonna kómir jetkizý josparlanǵan. Búginde sonyń 168 myń tonnasy, iaǵni 56 paiyzy ákelingen. Basqa óńirlerdi aitsaq, Aqmola oblysynda kommýnaldyq-turmystyq sektorǵa qajetti kómir 100 paiyz, iaǵni 730 myń tonna kóleminde jetkizildi. Shyǵys Qazaqstan oblysy boiynsha halyqqa 120 myń tonna kómir jetkziý josparlanǵan. Munda jospar 100 paiyz oryndaldy. Qaraǵandy oblysy boiynsha da jospar 100 paiyz oryndaldy – 536 myń tonna kómir», - dedi vedomstvo ókili.
Sondai-aq, ol kómir jetkizý josparyn keshiktirip jatqan óńirlerdi atady.
«Árine, halyqty kómirmen tolyq qamtamasyz etpei jatqan óńirler bar. Paiyzben alsaq, 70-96 paiyz aralyǵynda ǵana qamtylǵan. Mysaly, Aqtóbe oblysynda 28 myń tonna kómir kerek bolsa, búginde tek 8,4 myń tonna kómir ǵana ákelingen. Biraq jergilikti ákimdiktiń málimdeýinshe, jyl saiyn osylai keshigip jetkiziletin kórinedi. El ishinde ajiotaj joq dep otyr», - dedi Janat Igisinov.
