Elordadaǵy QR Ulttyq mýzeiinde «Beibitshilik taǵy» kórmesiniń tusaýkeseri ótti. Kórme adamzat tarihyndaǵy eleýli oqiǵalardyń biri – Semei iadrolyq poligony jabylýynyń 30 jyldyǵyna arnalady, dep habarlaidy QazAqparat.
Elordada alǵash ret ótkizilip jatqan «Beibitshilik taǵy» kórmesinde belgili sýretshi-patsifist Gonsalo Mabýndanyń (Mozambik) «Taq» jáne «Maska» atty erekshe jumystary usynyldy.
Músinderdiń basty ereksheligi – deaktivti qarý-jaraqtardyń qaldyqtarynan jasalýynda.
Gonsalo Mabýnda agressiia quraldaryn óner týyndylaryna ainaldyryp, adamzatty beibitshilikke úndeidi.
Kórmeniń ashylý saltanatyna «Degdar» gýmanitarlyq qory Qamqorlyq keńesiniń tóraǵasy Dariǵa Nazarbaeva, Qazaqstan sýretshileri akademiiasynyń prezidenti Amandos Aqanaev, QR Mádeniet jáne sport vitse-ministri Nurǵisa Dáýeshov, Nur-Sultan qalalyq mádeniet basqarmasynyń basshysy Nurlan Álimjanov, Á.Qasteev atyndaǵy Memlekettik óner mýzeiiniń direktory Gúlmira Shalabaeva, «Eýraziialyq mádeni alians» EKU kýratory Vladislav Slýdskii jáne basqa da qoǵam men óner qairatkerleri qatysty.
«Gonsalo Mabýndanyń «Taq» jáne «Maska» músinderi negiz bolǵan búgingi kórmeniń máni zor. Sýretshi-patsifist Gonsalo Mabýnda óziniń týǵan jeri Mozambikte uzaq jylǵy azamattyq soǵystyń aýyr zardabyn basynan ótkerdi. Beibit zaman ornaǵannan keiin ol avtomattar, snariadtar men atylǵan gilzalardan erekshe músinderdi jasap, surapyl soǵystyń qarý-jaraqtaryn óner týyndylary retinde usyndy. Qazirgi ýaqytta soǵys oty tutanyp, zorlyq-zombylyqtan zardap shegip júrgen el kóp. «Beibitshilik taǵy» kórmesiniń ideiasy óner tili arqyly barsha adamzatty soǵystan bas tartyp, tatýlyq pen kelisimge úndeýdi kózdeidi», - dedi Dariǵa Nazarbaeva.
Is-sharanyń tusaýkeserine qatysqan qoǵam qairatkerleri men ónertanýshylar «Beibitshilik taǵy» kórmesi tatýlyq pen kelisimniń mánin, beibit ómirdiń basty qundylyqtaryn baǵalaýǵa zor yqpalyn tigizetinine basa nazar aýdardy.
«Kórmede Qazaqstan, AQSh jáne Afrika sýretshileriniń jumystary da usynylǵan. Gonsalo Mabýndanyń týyndylary siiaqty bul shyǵarmalarda da týǵan jerge súiispenshilik, tarihqa taǵzym taqyryptary qozǵalǵan. Uiymdastyrýshylar Semei iadrolyq poligony jabylýynyń 30 jyldyǵyna arnalǵan jeke bólim de ázirlegen. Ekspozitsiiada 25-ten astam otandyq jáne sheteldik sheberlerdiń týyndysy jinaqtalǵan. Olardyń qatarynda Aisha Ǵalymbaeva, Amandos Aqanaev, Ábdirashit Sydyhanov, Ámen Haidarov syndy qazaq óneriniń maitalmandary bar», - dep atap ótedi «Degdar» gýmanitarlyq qorynyń baspasóz qyzmetinen.
Aita keterligi, «Degdar» gýmanitarlyq qory, QR Mádeniet jáne sport ministrligi, Nur-Sultan qalasynyń ákimdigi uiymdastyrǵan kórmege qoiylǵan músinder QR Ulttyq mýzeige syiǵa tartylmaq.
Al kórmeni qala turǵyndary 23 qazanǵa deiin tamashalai alady.
