Qalada halyq qajettiligin qamtamasyz etetin 30 myń tonna kóleminde azyq-túlik qory bar. Bul rette bilik tarapynan azyq-túlik qoryn tolyqtyrýǵa baǵyttalǵan qajetti sharalar qolǵa alynǵan, dep habarlaidy Nur-Sultan ákimdiginiń resmi saity.
Nur-Sultan qalasy Investitsiialar jáne kásipkerlikti damytý basqarmasynyń basshysy Erlan Bekmurzaev: «Karantin rejimi engizilgennen beri jarty aidan asa ýaqyt ótti. Qalaǵa taýarlar úzdiksiz jetkizilip jatyr, tapshylyq baiqalmaidy. Júk tasymaly úshin kire beriste «jasyl dáliz» jasalǵan. Karantin engizilgen sátten bastap qalaǵa jalpy kólemi 39812,2 tonnaly 3,776 júk kóligi kirdi. Onyń ishinde azyq-túlik ónimderi – 14 315,4 tonna. Bul bazar naryǵyndaǵy búgingi satylym kólemine sáikes keledi. Búginde qalada azyq-túlik qory jetkilikti», - deidi Ortalyq kommýnikatsiialar qyzmetindegi ótken brifingte.
E.Bekmurzaevtyń aitýynsha, qazirgi ýaqytta elordada 19 baǵdar boiynsha 30 myń tonna kóleminde áleýmettik mańyzǵa ie azyq-túlik bar. Onyń 25 myń tonnasy qoimalarda bolsa, qalǵan 5 myń tonnasy qalanyń turaqtandyrý qorynda saqtalǵan. Sonymen qatar, qala basshylyǵy qala rezervterin toltyrý boiynsha birqatar sharalar qabyldaýda.
«Birinshiden, óńirlermen jemis-kókónis, et jáne azyq-túlik ónimderiniń belgilengen baǵasy boiynsha «forvardtyq kelisimsharttar» jasaimyz. Bul Túrkistan, Jambyl, Aqmola jáne Pavlodar oblystaryna qatysty. Ekinshiden, «ainylym shemasy» boiynsha kúrish, qaraqumyq jáne kókónis tobyna (kartop, piiaz, sábiz, qyryqqabat) belgilengen baǵamen satylatyn iri bólshek saýda jelilerimen jeńildetilgen nesie týraly kelisimge qol qoidyq», - deidi basqarma basshysy.
Sonymen qatar jergilikti biýdjetten qosymsha 1,5 mlrd. teńge bólindi. Bul áleýmettik mańyzy bar azyq-túlik taýarlarynyń baǵasyn belgileý úshin jeńildetilgen nesielerge de baǵyttalǵan. Sonyń ishinde kúnbaǵys maiy, sút, et jáne azyq-túlik ónimderin satyp alý josparda tur. «Qajetti un satyp alynǵandyqtan, birinshi sortty bólke nan baǵasy 90-95 teńge kóleminde saqtalady. Turaqtandyrý qorynan qanttyń baǵasy 220 teńgeden aspaityn taýarlyq interventsiia jasalyp jatyr. Bul «Magnum», «KeńMart», «Astyqjan», «VkýsMart», «A2», «Metro» sýpermarketteri men «Shapaǵat» bazary arqyly júzege asydy.
Úkimet tarapynan áleýmettik mańyzy bar azyq-túlik taýarlarynyń baǵasyn retteý maqsatynda 9 taýarǵa shekti baǵa qoiyldy. Atap aitsaq, olar: suryptalǵan bidai uny, (197 teńge), birinshi surypty unnan jasalǵan qalypty nan, (150 teńge / kg, 82,5 teńge / 500 gr.), ólshemeli makaron (230 teńge), qaraqumyq jarmasy (239 teńge), óńdelgen kúrish (307 teńge), siyr eti (iyq-keýde súiekteri) (2113 teńge), taýyq jumyrtqasy (I sanat) (351 teńge), kúnbaǵys maiy (481 teńge), as tuzy («Ekstrany» qospaǵanda) (55 teńge).
Baǵalar ár óńirde jeke belgilengen. Bekitilgen baǵalar týraly aqparat e-gov.kz resmi saitynda ornalasqan. Sonymen qatar tiisti mekemeler quramynda mobildi toptar quryldy. Aryz-shaǵymdar men túsken aqparattar boiynsha reid jasalady.
«Múmkindikti paidalana otyryp, saýda salasyndaǵy barlyq kásipkerlerdi shekti baǵa mólsherin qatań saqtaý qajettigi týraly taǵy da habardar etkim keledi. Belgilengen baǵadan asqan jaǵdaida kásipkerlerge 265 myń teńgeden 530 myń teńgege deiin aiyppul salynady», - deidi Nur-Sultan qalasy investitsiialar jáne kásipkerlikti damytý bóliminiń basshysy Erlan Bekmurzaev.
