Elordanyń oiyn-saýyq oryndarynda túngi 23.00-den tańǵy 08.00-ge deiin ishimdik satýǵa shekteý qoiý usynyldy, dep habarlaidy Elorda Aqparat.
Bul usynys qala ákimdiginde oiyn-saýyq mekemeleri men halyq kóp jinalatyn oryndarda qoǵamdyq tártip pen qaýipsizdikti kúsheitý týraly ótken jinalysta aityldy.
"Tártip buzýshylyqtyń basym bóligi ishimdik ishken soń bolady. Sondyqtan meiramhana, dámhanalarda túngi saǵat 23.00-den tańǵy 08.00-ge deiin ishimdik satýdy shekteýdi usynamyz", - dedi qalalyq IID jergilikti politsiia qyzmeti basshysynyń orynbasary Gosman Jakin.
Biyl 41 oiyn-saýyq mekeme iesine tártip buzýshylyqqa ákelip soǵatyn jaittardy joiý kerektigi eskertilgen.
"Temeki buiymdaryn satý erejesin buzǵany úshin 86 mekeme jetekshisine, túnde oiyn-saýyq oryndaryna kámelettik jasqa tolmaǵandardy kirgizgeni úshin 115 mekemege eskertý berildi", - dedi Gosman Jakin.
2018 jyldyń qarasha aiynan bastap patrýldik qyzmettiń jumys isteý tártibi ózgergen bolatyn. Politseilerdiń birazy tártip buzýshylyqty kólikpen emes, jaiaý júrip tekseredi. Demalys jáne mereke kúnderi barlyq oiyn-saiyq oryndarynyń janynda politsiia qyzmetkerleri kezekshilik etedi.
Jyl basynan beri oiyn-saýyq oryndaryndaǵy tártip buzýshylyq jaily úsh myńǵa jýyq qońyraý túsken.
