Meningitke shaldyqqan eki balanyń jaǵdaiy qazir turaqty. Bul týraly elordadaǵy №3 kópbeiindi qalalyq balalar aýrýhanasynyń bas dárigeri Iran Shametekov málimdedi, dep habarlaidy Sputnik Qazaqstan.
Onyń aitýynsha, qazir statsionarda "meningit" diagnozymen 59 patsient em qabyldap jatyr. Onyń ishinde virýsty meningitke 53 bala, bakteriialyq meningitke 6 patsient shaldyqqan. Negizinen olar 6-7 jastaǵy balalar, arasynda úsh jasqa deiingi sábiler de bar. Barlyq patsienttiń jaǵdaiy turaqty.
"№30 balabaqshadan túsken balalardyń jaǵdaiy turaqty, nasharlaý baiqalmaidy. Bireýi 7 qyrkúiekte, ekinshisi 8 qyrkúiekte tústi. Diagnostika men emdeý hattamasyna sáikes em qabyldap jatyr", - dedi bas dáriger qoǵamdyq densaýlyq saqtaý basqarmasynda ótken brifingte.
Shametekov meningitke shaldyqqandardy der kezinde anyqtaý jáne ýaqytynda meditsinalyq kómek kórsetý úshin emhanalardyń janynan filtr-kabinetter ashylǵanyn eske saldy. Ol jerde dárigerler qyzýy kóterilip, basy aýyrǵan balalardy qarap-tekseredi, sondai-aq patronaj qyzmeti belsendi jumys isteidi.
Dárigerler juqpaly entrovirýstyq infektsiialar jaz jáne kúz mezgiliniń basynda órshitinin atap ótti. Virýs aýa-tamshy arqyly (jótelgende, túshkirgende jáne sóilesý kezinde) taralady.
Negizinen úsh jastan on jasqa deiingi balalar infektsiia juqtyrýǵa beiim keledi.
