Elorda politseileri turǵyndarǵa týristik aimaqtarǵa barýdan bas tartýǵa keńes beredi. Koronavirýspen kúres jáne karantindik sharalardyń kúsheiýi barysynda týristik aimaqtar jabylady, dep habarlaidy "Ult aqparat" elordalyq Politsiia departamentine silteme jasap.
Nur-Sultan qalasynan shyǵatyn joldarǵa beketter qoiylǵan, onda elordalyq politseiler azamattarmen demalys oryndaryndaǵy avtokóliktiń qozǵalysy shektelgeni týraly túsindirý jumystaryn júrgizedi jáne maska taǵyp, áleýmettik qashyqtyqty saqtaý qajettigi týraly eskertedi.
«Shekteý sharalary únemi airyqsha baqylaýda bolady. Koronavirýspen kúresý úshin elorda turǵyndary men qonaqtary jaǵdaiǵa túsinistikpen qarap, sýǵa shomylý maýsymy ótip jatqan demalys oryndaryna, adam kóp jinalatyn oryndarǵa barmaýy qajet», - dedi Nur-Sultan qalasynyń Politsiia departamenti Jergilikti politsiia qyzmetiniń basshysy Ǵosman Jakin.
Sońǵy eki kúnde Nur-Sultanda politsiia qyzmetkerleri, epidemiologter, volonterler, jergilikti atqarýshy organdardyń ókilderi bar mobildi toptar karantindi buzýdyń 50 oqiǵasyn tirkeldi, onyń ishinde 29 kásipker maska kiiý jáne áleýmettik qashyqtyqty saqtaý boiynsha mindetti talaptardy buzǵan jáne 21 kásipker – tyiym salynǵan ýaqytta jumys istegen. Zańbuzýshylyqtar týraly materialdar jergilikti Densaýlyq saqtaý organyna – Taýarlar men qyzmetterdiń sapasy men qaýipsizdigin baqylaý departamentine berildi.
Qazirgi ýaqytta elordada 16 monitoring mobildi toby jumys isteidi. Politsiia qyzmetkerleri oiyn-saýyq oryndaryna, qoǵamdyq tamaqtaný nysandaryna, saýna, monshalar, attraktsiondarǵa kirip, karantindik sharalar týraly eskertedi jáne tártip buzýshylyq faktilerin anyqtaidy.
«Nur-Sultan qalasynyń Politsiia departamenti azamattardy qoǵamdyq oryndarda jaýapty bolýǵa jáne sanitarlyq normalardy saqtaýǵa shaqyrady. Sondai-aq koronavirýstyń taralýyna jol bermeý maqsatynda turǵyndarǵa qala syrtyna shyqpaýǵa shaqyrady», - deidi departament.
