Nur-Sultan ákimdiginiń resmi saity «Feisbýkte» elorda aýdandary basshylary men ákimdiktiń qurylymdyq bólimsheleri basshylarynyń paraqshalaryn jáne olardyń uialy telefondarynyń jeke nómirlerin jariialaidy, dep habarlaidy ákimdiktiń baspasóz qyzmeti.
Baspasóz málimetine qaraǵanda, elorda basshysy Baqyt Sultanov aýdan ákimderi, qalalyq basqarmalar men departamentterdiń basshylaryna turǵyndarmen tyǵyz bailanys ornatý úshin áleýmettik jelilerdegi jumysty jandandyrýdy tapsyrdy.
«Qazaqstan Prezidenti Qasym-Jomart Toqaevtyń tapsyrmasy boiynsha barlyq aýdan ákimderi men basqarma basshylary qala turǵyndarymen turaqty bailanysta bolýǵa tiis. Kontenttiń mazmunyna erekshe nazar aýdarý qajet. Sondai-aq, belgili bir áleýmettik jelige ǵana qosylýdyń qajeti joq. Aýditoriiany naqty bilý ári seziný kerek. Mysaly, meniń bilýimshe, oqýshylar men stýdentter «VKontakte» jelisin paidalanady. Sondyqtan bilim basqarmasynyń qyzmetkerleri tek «Feisbýkte» ǵana emes, «VKontakte» jelisinde bolýy kerek. «Tvitterdi» investitsiialardy tartý, brendtiń atyn shyǵarý úshin paidalanýǵa bolady. Bul tapsyrmany oryndaýǵa júieli túrde kirisý kerek», - dep atap ótti Baqyt Sultanov.
Esterińizge sala keteiik, 27 naýryzda Qazaqstan Prezidenti Qasym-Jomart Toqaev ákimderge halyqtyń saýaldaryna jedel jaýap berýdi tapsyrdy.
«Ákimder halyqtyń suranystaryna jedel den qoiyp, túsindirý jumystaryn júrgizý qajet. Áleýmettik jelilerde belsendi jumys isteý mańyzdy: messendjerlerde toptar quryp, júrgizilip jatqan saiasatty túsindirip, jaǵdaidy jetildirý kerek», - dedi Q.Toqaev oblys, Nur-Sultan, Almaty jáne Shymkent qalalarynyń ákimderimen ótken keńeste.
