Túrkistan oblysynda «Nur Otan» partiiasy «Mektepke jol» aktsiiasyn jalǵastyrýda. Partiianyń Sairam aýdandyq filialy áleýmettik az qamtylǵan kópbalaly otbasylarǵa kiim-keshekter men oqý quraldaryn tartý etti, dep habarlaidy "Ult aqparat".
Aktsiia barysynda aýdandyq partiia filialyna kelip ótinish bildirgen ata-analardyń balalaryn jańa oqý jylyna daiyndaýǵa kómek kórsetildi. Sharaǵa «Nur Otan» partiiasy Túrkistan oblystyq filialy tóraǵasynyń birinshi orynbasary Beisen Tájibaev, Sairam aýdanynyń ákimi Baqtiiar Mamaev, aýdandyq máslihat depýtattary men jergilikti turǵyndary qatysty. Óz kezeginde Beisen Tájibaev sóz sóilep, oqýshylardy jańa oqý jylymen quttyqtady.
«Nur Otan» partiiasynyń dástúrli túrde ótkizetin «Mektepke jol» respýblikalyq aktsiiasy aiasynda biz áleýmettik az qamtylǵan otbasylarǵa qol ushyn berip kelemiz. Biylǵy jylǵy aktsiianyń bastamasy Sairam aýdanynan bastaldy. Barlyq búldirshin mektepke tolyqqandy oqý jabdyqtarymen qamtylmaýy bizdiń azamattyǵymyzǵa úlken syn. Partiia atynan uiymdastyrylyp jatqan aktsiiaǵa máslihat depýtattary, «Nur Otan» partiiasy fraktsiiasynyń músheleri men partiialas áriptesterimizdiń qosqan úlesi zor. Jas óskinderdiń muqtajdyǵyna eshqashan jol bermeimiz»,– dep atap ótti B.Tájibaev.
Aktsiia sheńberinde partiia filialyna balalaryn mektepke daiyndaýǵa kómek berýin suraǵan 24 otbasy músheleriniń 50 oqýshysyna mektepke qajetti oqý-quraldarymen jasaqtalǵan sómkeler berildi. Sharaǵa qatysqan sairamdyqtar ótinishterin qaraýsyz qaldyrmai kómek kórsetken «Nur Otan» partiiasynyń filialyna alǵystaryn bildirdi. Atap óteiik, búgingi kúnge deiin aýdandyq máslihat depýtattary, partiia fraktsiiasynyń músheleri men partiialastar tarapynan 845 otbasyǵa 4 152 400 teńge kóleminde materialdyq kómek kórsetilgen.
