«Nur Otan» partiiasy Túrkistan oblystyq filialy saiasi uiymnyń Tóraǵasy, Elbasy Nursultan Nazarbaevtyń tapsyrmalaryn oryndaý maqsatynda óz quziretinde oblys kóleminde sheshimin tappaǵan ózekti máselelerdi sheshýge atsalysady. Bul týraly búgin Túrkistanda ótken «Nur Otan» partiiasy Túrkistan oblystyq filialynyń Saiasi keńes májilisinde partiia filialy Tóraǵasy Ómirzaq Shókeev málim etti, dep habarlaidy "Ult aqparat".
Partiianyń jeti baǵyty boiynsha jumys júrgizýdi tapsyrǵan óńir basshysy «Nur Otan» partiiasynyń halyqqa jaqyn bolýy úshin barynsha ashyq formatqa kóshýdi tapsyrdy.
«Partiia ashyq bolýy tiis. Onyń ǵimaratyna ár adam erkin kirýi tiis. Osy oraida oblystaǵy jobalyq keńsemen birge «Nur Otan» partiiasy oblystyq filialy «Open space» formatymen jumys isteýi tiis. Ol úshin basqa ǵimaratqa kóshedi. Men ózim osy ashyq alańǵa kelip, partiiamen birge halyqpen jii kezdesetin bolamyn», - dedi Ómirzaq Shókeev.
Jiynda baiandama jasaǵan partiia filialy tóraǵasynyń birinshi orynbasary Beisen Tájibaev oblystaǵy birqatar máselelerge toqtaldy. Onyń aitýynsha, demografiialyq ósimi eń joǵary Túrkistan oblysynda 2 millionǵa jýyq turǵynnyń 464 033 myńy – oqýshy balalar. Osy balalardyń jan-jaqty damýyna, quqyǵynyń qorǵalýyna jaýaptylyqty kúsheitý kerek. Alaida bilim berý uiymdarynda ótkizilip jatqan aýqymdy sharalarǵa qaramastan, jasóspirimder arasyndaǵy qylmys pen quqyqbuzýshylyq deńgeii tómendemeýde.
«Búgingi bala – erteńgi qoǵam múshesi, memleketti qalyptastyratyn tulǵa» dep qarasaq, balalardyń quqyǵyn saqtaýdy barlyǵymyz osyndai alqa otyrystarynda ashyq talqylap iske asyrsaq, bolashaq urpaqtyń zorlyq-zombylyqqa ushyramasy anyq. Osy maqsatta otbasy institýtyn qoldaýǵa baǵyttalǵan «Baqytty otbasy» jobasy aiasynda partiianyń oblystyq, aýdandyq, qalalyq filialdary janynan «Balalardyń quqyqtary men zańdy múddelerin qamtamasyz etý jónindegi monitoring júrgizý jáne qoǵamdyq baqylaý toptary» qurylyp, birshama jumystar atqaryldy jáne oblys boiynsha ómirlik qiyn jaǵdaidaǵy kópbalaly otbasylarǵa monitoring júrgizilýde», - dedi Beisen Tájibaev.
Partiia músheleri bas qosqan jiynda jumyssyzdyq máselesi de sóz boldy. Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasy sheńberinde 2019 jyly 71 828 adamdy jumyspen qamtý sharalaryna qatystyrý josparlanyp, naqty 43 296 adam jumyspen qamtý sharalaryna qatysqan, bul halyqtyń nebári 60,2%-yn qurap otyr. Sondai-aq Shardara, Keles, Jetisai, Maqtaaral, Saryaǵash aýdandarynda aýyldyń ishki joldary men respýblikalyq mańyzy bar trassalardyń sapasy syn kótermeidi. Atalǵan 5 aýdannyń halyq sany 700 myńǵa jýyqtasa, olardyń ómiri tikelei jolmen tyǵyz bailanysty. Statistikaǵa súiensek, jol nasharlyǵynan 2019 jyldyń alǵashqy 7 aiynda 117 jol-kólik oqiǵasynda 16 adam kóz jumǵan. Bul degenimiz «Nur Otan» partiiasynyń elimizdegi injenerlik-áleýmettik infraqurylymdy damytýǵa baǵyttalǵan «Qutty meken» ulttyq jobasynyń óz dárejesinde iske aspai otyrǵandyǵyn ańǵartady.
«Shekaralas aýmaqtaǵy strategiialyq mańyzy bar osy aýdandardaǵy joldardyń sapasyn jaqsartatyn kez jetti. Bul – el tilegi. Sondyqtan atalǵan aýdandardyń joldaryn jańartýdy jáne osy baǵyttaǵy jumysty jandandyrý úshin partiianyń XVIII Sezinde qabyldaǵan «Qutty meken» ulttyq jobasy aiasynda partiialyq baqylaýdy kúsheitýdi usynamyz», - dedi partiia filialy tóraǵasynyń birinshi orynbasary.
Sonymen qatar, qazirgi tańda áleýmettiń ózekti taqyrybyna ainalǵan ataýly áleýmettik kómekti alýdaǵy zańsyzdyqtar da sóz boldy. «E-Halyq» aqparattyq júiesiniń derekterine sáikes, 1000-ǵa jýyq otbasy tabysy tómen jáne muqtaj otbasylarǵa ǵana beriletin ataýly áleýmettik kómekti zańsyz alý úshin ózderiniń naqty tabysyn jasyrǵan. Osyǵan bailanysty ruqsatsyz tólengen tólemderdi qaitarý jáne qaita qaraý, zańbuzýshylyqtardyń aldynalý boiynsha árbir anyqtalǵan faktige sáikes jeke-jeke jumys júrgizilýde», - dedi Beisen Tájibaev.
Jiyn qorytyndysynda partiia filialy azamattardan kelip-túsken aryz-ótinishterdi der kezinde qarap, olardy zań aiasynda ońtaily sheshý maqsatynda apta saiyn taqyryptyq qoǵamdyq qabyldaýlar ótkizýdi kelisti. Oblystyq partiia filialynyń ǵimaratyndaǵy qabyldaýlarǵa memlekettik organ basshylarynyń qatysyp, áleýmettik jelilerde, tikelei efirde kórsetiletin boldy.
