Búgin «Nur Otan» partiiasy Túrkistan oblystyq filialy Saiasi keńes májilisin ótkizdi. Basqosýda Nur-Sultan qalasynda ótken partiianyń Saiasi keńesiniń keńeitilgen otyrysynda qaralǵan ózekti máseleler men ony oblys aimaǵynda iske asyrýdyń tiimdi joldary talqylandy, dep habarlaidy "Ult aqparat".
Májiliske «Nur Otan» partiiasy Túrkistan oblystyq filialynyń tóraǵasy, oblys ákimi Ómirzaq Shókeev pen saiasi keńestiń músheleri, qoǵam ókilderi men aýdandyq máslihat hatshylary, fraktsiia jetekshileri qatysty. Jiynda aimaq basshysy jańǵyrtý baǵdarlamasyna keńinen toqtalyp, birqatar tapsyrmalar júktedi. Onyń aitýynsha, aldymen partiianyń belsendi múshelerin aiqyndap alý qajet.
«Partiiada el degende janashyrlyqpen jumys isteitin, halyqqa shyn jany ashityn belsendiler bolýy kerek. Ekinshi, jastar jylyna orai, ákimdik, basqarma basshylary, ziialy qaýym, belsendilerdi tarta otyryp «Jas Otan» jastar qanatymen birge dialogtyq alań quryp, pikir-saiystar ótkizýimiz qajet. Úshinshi, sybailas jemqorlyqpen kúreste partiialyq baqylaý qajet. Tórtinshi, partiia azamattardyń ózekti máselelerin sheshýde kómek kórsetýi tiis», - dedi Ómirzaq Shókeev.
Oblys ákiminiń sózinshe, partiiada qarapaiym halyqpen qatar kásipkerlerge zań júzinde keńes berilip, olardyń aryz-shaǵymyn tyńdaityn Qoǵamdyq biznes-qabyldaý ashylýy qajet. Oblystaǵy, aýdandaǵy áleýmettik-ekonomikalyq, saiasi jaǵdaidy nasihattaýda, ózekti máselelerdi buqaralyq aqparat quraldary nasihattaýy kerek.
«Tórtinshi bilik atanǵan BAQ shynaiy aqparat taratyp, obektivti material jariialaýy tiis. Elbasy tapsyrmasyna sáikes «Bolashaqqa baǵdar: rýhani jańǵyrý» baǵdarlamalyq maqalasy aiasynda «Aýyl el - besigi» jobasy bizdiń oblysta qarqyndy júzege asýda. Osy halyqtyq jobanyń júzege asýyn partiialyq baqylaýǵa alyp, sapaly oryndalýyn tapsyramyn. Sonymen qatar, Túrkistannyń mádeni-rýhani baǵyttaǵy deńgeiin arttyrýǵa Partiia filialy «Miras» qoǵamdyq keńesi arqyly barynsha atsalysýy kerek», - dedi partiia filialynyń tóraǵasy.
Sondai-aq, jiynda oblystyq partiia filialy tóraǵasynyń birinshi orynbasary Beisen Tájibaev óńirdegi áleýmettik-ekonomikalyq, mádeni-rýhani saladaǵy ózekti máselelerdi qamtyǵan baiandama jasady.
Májilis barysynda kún tártibine sáikes «NurOtan» partiiasy Saiasi keńesiniń birqatar músheleri de baiandama jasap, qoǵamdaǵy ózderin tolǵandyrǵan máselelermen bólisti. Jiyn sońynda Saiasi keńes májilisiniń qaýlysy qabyldandy.
