Saiasi keńestiń aimaqtyq biýrosynyń usynysymen «Nur Otan» partiiasy Batys Qazaqstan oblystyq filialy tóraǵasynyń birinshi orynbasary bolyp Murat Muqaev taǵaiyndaldy. Ol bul taǵaiyndaýǵa deiin Oral qalasynyń ákimi bolyp jumys istedi.
Buǵan deiin «Nur Otan» partiiasy Tóraǵasynyń birinshi orynbasary Baýyrjan Baibek Batys Qazaqstan oblysyna jasaǵan jumys sapary barysynda oblystyq filialdyń barlyq deńgeidegi máslihattardaǵy fraktsiialarmen jumysyn aitarlyqtai kúsheitý kerektigin aitqan bolatyn.
– Qazirgi tańda partiianyń aldynda turǵan eń basty másele – halyqtyń senimi. Biz ózekti máselelerdi birlese otyryp sheshý úshin depýtattarmen ózara jumys isteý barysyn qaita qarap, kúsheitýimiz qajet. Búginde aimaqtardaǵy fraktsiialardyń jumysy keibir jaǵdaida ýaqyt talaptaryna sai kelmeidi. Partiialyq baqylaý júiesi arqyly atqarýshy organdardyń jaýapkershiligin arttyrý kerek. Halyqtan kelip túsken ótinishterdiń eshqaisysy nazardan tys qalmaýy tiis. Birinshi jartyjyldyqta filialda qala ákimi orynbasarlarynyń azamattardy qabyldaýy ótpegen, – dedi Baýyrjan Baibek.
Aita keteiik, «Nur Otan» partiiasynyń Lideri Nursultan Nazarbaevtyń partiiany qaita jandandyrý jáne kadrlardy jańartý jónindegi tapsyrmasyna sáikes, buǵan deiin Erlan Kanalimov Nur-Sultan qalalyq partiia filialy tóraǵasynyń birinshi orynbasary bolyp taǵaiyndaldy. Sondai-aq, jumysyna bailanysty atyna kóptegen aryz-shaǵymdar túsken «Nur Otan» partiiasy Túrkistan oblystyq filialynyń birinshi orynbasary qyzmetinen bosatyldy.
