Qaraǵandy qalasynda «Nur Otan» partiiasynyń qoldaýymen jáne oblys ákimdiginiń uiymdastyrýymen halyqaralyq aqyndar aitysy ótti. Eki kúnge jalǵasqan sóz saiysy qazaqtyń birtýar uly, Alash ardaqtysy Sáken Seifýllinniń 125 jyldyǵyna arnaldy. Aitysty tamashalaýǵa arnaiy kelgen «Nur Otan» partiiasy Tóraǵasynyń Birinshi orynbasary Baýyrjan Baibek eldiń múddesin jyrǵa qosqan aqyndardyń tapqyrlyǵyna rizashylyǵyn bildirdi.
Óz sózinde Baýyrjan Baibek qoǵamdyq oi men mádeni tarihymyzda erekshe orny bar kúresker tulǵaǵa arnap ótkizilgen bul aitys «tar jol, taiǵaq keshý» zamanda ómir súrgen aiaýly aqynnyń rýhyn asqaqtatyp qana qoimai, birligimiz ben yntymaǵymyzdy da nyǵaita túskenin aitty.
Sondai-aq ol aitystyń ulttyq muramyz ǵana emes, qoǵamdaǵy ózekti máselelerdi ashyq aityp, olardyń aldyn alý joldaryn usynatyn utymdy tetik ekenin de tilge tiek etti.
– Qazaqta «aýrýyn jasyrǵan óledi» degen sóz bar. Sonldyqtan biz kemshilikterimizdi ashyq aityp, olardy sheshý joldaryn qarastyrýymyz kerek. Bul rette aitystyń róli erekshe. Aitys – bizdiń rýhani bailyǵymyz. Sol sebepti partiia tól ónerimizdi qolǵa alyp, júieli túrde qoldaý kórsetetin bolady, – dedi Baýyrjan Baibek.
Sonymen partiia Tóraǵasynyń Birinshi orynbasary partiianyń saiasi doktrinasynda rýhaniiat, mádeniet, ulttyq qundylyq máselesine úlken kóńil bólingenin jetkizdi.
– Tól mádenietimizdi tórge shyǵarmasaq jetistikterge jete almaimyz. Sondyqtan bizdiń partiia aitysty qolǵa alyp otyr. Tek biylǵy jyldyń sońyna deiin «Nur Otan»-nyń qoldaýymen bes alaman aitys ótedi. Onyń alǵashqysy Atyraýda ótken Fariza Ońǵarsynovanyń 80 jyldyǵyna arnalǵan aitys bolsa, ekinshisi Saryarqa tórindegi búgingi sóz saiysy. Odan bólek, qyrkúiektiń sońynda Almaty qalasynda «Otan otbasynan bastalady» atty otbasylyq aitys ótedi. Al qazan aiynda Nur-Sultan qalasynda jáne jyl sońynda Oral qalasynda «Altyn dombyra» respýblikalyq aqyndar aitysy uiymdastyrylady, – dedi Baýyrjan Baibek.
Aita keteiik, Qaraǵandydaǵy aitystyń nátijesinde Maqsat Aqanov pen Jandarbek Bulǵaqov bas júldege ie boldy. Al Didar Qamiev, Muhtar Niiazov jáne Baýyrjan Shirmedinuly ekinshi oryn alsa, Aibek Qaliev, Ásem Erejeqyzy, Búrkitqazy Ádilbek, Bekarys Shoibekov, Nurmat Mansurovtar úshinshi orynnan kórindi. Júldeger atanǵan barlyq aqynǵa qarjylai syi-siiapat kórsetildi. Olardan bólek, taǵy birqatar aityskerge shabyttaný syilyǵy berildi.
