«Nur Otan» janyndaǵy Otbasy, áielder jáne balalardyń quqyqtaryn qorǵaý máseleleri jónindegi respýblikalyq qoǵamdyq keńeste JOO, kolledjder, mektepter men balabaqshalarda inkliýzivti bilim berý úshin jaǵdai jasaý jáne sailaýaldy ýádelerdi oryndaýdyń basqa da ózekti máseleleri qaraldy, dep habarlaidy partiianyń baspasóz qyzmeti.
Otyrysqa qatysýshylar mektepke baratyn erekshe balalardy ádistemelik súiemeldeý máselelerin talqylady. Keńes múshesi, «Bolashaq» qorynyń basshysy Dinara Shaijúnisovanyń aitýynsha, pedagog-assistentterdiń shamadan tys júktemesi búginde túiindi máselelerdiń biri bolyp otyr.
«Qazirgi tańda olar aiyna 90 myń teńge jalaqyǵa jumys istep, kem degende 2 balany oqytyp, qolǵabys jasaidy. Mamandar turaqtamaityndyqtan, balalar oqi almai, qamqorlyqsyz qalady. Osynyń saldarynan keide balalar tolyqtai bir oqý jyly boiy bilim ala almaǵan jaǵdailar da bar. Bizdiń jobada 300-ge jýyq pedagog-assistent jumys isteidi. Olardyń barlyǵy eńbekaqynyń azdyǵynan jumystan ketkileri keledi», - dedi Dinara Shaijúnisova.
Bilim jáne ǵylym ministrliginiń aqparatyna sensek, elimizde myńǵa jýyq pedagog-assistent jumys isteidi, qosymsha pán muǵalimderi arnaiy kýrstardan ótýde. Al jalaqynyń tómen bolýy olardyń biliktilik deńgeiine bailanysty kórinedi.
Otyrys barysynda keńes músheleri internattardyń da jai-kúiin talqylady. Búginde elimizde barlyǵy 577 internat bar, olarda 147 myńnan astam bala turady. Bul – kórý, estý qabileti buzylǵan balalarǵa arnalǵan arnaiy internattar, meditsinalyq-áleýmettik mekemeler jáne daryndy balalarǵa arnalǵan mamandanǵan, sondai-aq kópbalaly jáne az qamtylǵan otbasylardan shyqqan balalarǵa arnalǵan internattar, mektep janyndaǵy internattar, mektep-internattar.
Keńes tóraǵasy, Májilis depýtaty Dinara Zakieva atap ótkendei, 2019 jyldyń aqpan aiynda partiialyq tyńdaýlarda Keńes keibir internattyq mekemelerindegi adam shoshyrlyq jaǵdai týraly máseleni kótergen bolatyn. «Nur Otan» aralasqannan keiin ǵana 19 internat jóndelip, káriz júrgizildi, jihaz ben jabdyq jańartyldy. Alaida, bul másele barlyq internattyq mekemelerdegi balalardyń ómirin túbegeili ózgertý jáne jaqsartý úshin únemi nazar aýdarýdy jáne júieli jumysty talap etedi.
«Tiisti depýtattyq saýal osy jyldyń aqpan aiynda joldandy. Osyǵan qaramastan, 2 jyl ishinde bilim ministrligi tarapynan eshqandai júieli is-qimyl atqarylmady. Bilim jáne ǵylym ministrligi elimizdegi balalardyń quqyqtaryn qorǵaýǵa jaýapty ekenin túsine me? Biz óńirlik keńesterden internattar boiynsha óz betinshe jumys júrgizýdi, olardyń árqaisysyndaǵy jaǵdaidy jaqsartý úshin ákimdiktermen birlesip sheshim qabyldaýdy suradyq. Sodan keiin ǵana bizdiń qolymyzǵa qandai internatta kúrdeli nemese aǵymdaǵy jóndeý júrgizilgeni nemese júrgiziletini, ne qajet ekeni týraly naqty aqparat tidi. Bul baǵyttaǵy jumystardy jalǵastyramyz, al óńirlik Keńester árbir internattaǵy jaǵdaidy jaqsartý boiynsha mindettiń oryndalýyn baqylaýǵa alady. Bizdiń maqsatymyz – elimizdegi barlyq internattardy balalardyń ómir súrýine qolaily etý», - dedi ol.
Keńes músheleri 534 internat mekemelerindegi jaǵdaidy zerttedi. Dinara Zakievanyń aitýynsha, barlyq internattardy kúrdeli jáne aǵymdaǵy jóndeýden ótkizgen jalǵyz aimaq – bul Pavlodar oblysy. Sondai-aq, bul iste Qostanai oblysy da alda keledi: oblystaǵy 36 internattyq mekemeniń 29-y jóndelgen. Sońǵy 3 jylda internattary múldem jóndeý kóýrmegen Qyzylorda men Mańǵystaý oblystaryndaǵy jaǵdai bárinen nashar.
«Almaty oblysynda tek 3 mekemege kúrdeli jóndeý júrgizilse, al qalǵan mekemelerde tipti josparlanbaǵan. Túrkistan oblysynda tek 1 mekemede kúrdeli jóndeý júrgizildi, bul – biz baryp, másele kótergen internat. Biraq óńirde budan basqa taǵy 40 internat bar. Qaraǵandydaǵy №68 mektep-internatynda jataqhana mekteptiń birinshi qabatynda ornalasqan, munda bir bólmede 15-ten 25-ke deiin bala turady. Osy jaǵdaiǵa Qaraǵandydaǵy áriptesterimniń nazaryn aýdarǵym keledi», - dep qosty ol.
Internat mekemelerindegi jaǵdaidy jaqsartý úshin Aqtóbe, Qyzylorda, Aqmola jáne Mańǵystaý oblystarynda tiisti josparlar joq.
Bilim jáne ǵylym vitse-ministri Sholpan Karinovanyń aitýynsha, birlesken buiryq jobasy ázirlengen. Oǵan sáikes balalardyń, onyń ishinde ata-anasynyń qamqorlyǵynsyz qalǵan jetim balalardyń bilim alýǵa, tamaqtanýǵa, tasymaldaýǵa, demalýǵa quqyqtaryn saqtaý monitoringi men baqylaýy josparly túrde júrgiziletin bolady. Budan basqa, Ákimshilik quqyq buzýshylyq týraly Kodekske tekserý qorytyndylary boiynsha shyǵarylǵan nusqamalardy oryndamaǵany úshin ákimshilik jaýaptylyqqa tartý quqyǵyn berý bóliginde túzetýler engiziledi.
Otyrys qorytyndysy boiynsha Keńes Bilim jáne ǵylym ministrliginen 2022 jyly inkliýzivti bilim berý úshin jaǵdai jasaý josparlanyp otyrǵan mekemelerdiń tizimin, sondai-aq anyqtalǵan problemalardy, olardy sheshý merzimderi men joldaryn kórsete otyryp, internattyq mekemeler monitoringiniń nátijeleri boiynsha esep berýdi surady. Sonymen qatar, keńes músheleri internattyq mekemeler boiynsha normativtik-quqyqtyq aktilerdi qaita qaraýdy usyndy.
