Qaraǵandyda jergilikti joǵary oqý ornynda ashylǵan orys tili ortalyǵyna bailanysty daý týdy. Qalanyń qoǵamdyq belsendileri ortalyqty "Rýsskii mir" qory ashty dep kúdiktenedi. Ony áigili reseilik depýtat Viacheslav Nikonov basqarady, - dep habarlaidy Tengrinews.kz.
4 maýsymda Bóketov atyndaǵy Qaraǵandy ýniversitetinde orys tili ortalyǵy ashylǵan. Qaraǵandylyq qoǵam belsendileri "Rýsskim mir" qorynyń resmi saitynda osy aqparat jariialanǵanyn jazdy. Soǵan bailanysty, olar ortalyqtyń qorǵa qatysy bar dep kúdiktenedi. Alaida kóp uzamai saittaǵy aqparat óshirilgen. Biraq birqatar BAQ-ta aqparattyń skrinshottary qalǵan, al Google qordyń saitynda buryn jariialanǵan osy jańalyqqa silteme beredi.
Alaida Bóketov atyndaǵy Qaraǵandy ýniversiteti aqparatty joqqa shyǵardy. Ýniversitettegiler ortalyqtyń "Rýsskii mir" qoryna eshqandai qatysy joq ekenin aitty. JOO aqparaty boiynsha, ortalyq halyqaralyq Orys tili kúni qarsańynda filologiia fakýltetinde ashylǵan.
"Sońǵy ýaqytta ýniversitette tilderdi jetik meńgerý úshin aǵylshyn, nemis, qytai, túrik tilderi kabineti ashyldy. Jaqynda ashylǵan orys tili men ádebieti kabineti osy mamandyq stýdentterine, sondai-aq jaqyn jáne alys shetel stýdentterine orys tili men ádebietin oqytýǵa arnalǵan. Kabinetti ashý máselesi Resei Federatsiiasynyń Tótenshe jáne Ókiletti elshisimen talqylandy. Kelissózder 2017 jyldan 2019 jylǵa deiin úsh jyl boiy júrgizildi", - dedi ýniversitet ókili.
Sondai-aq, elshilik ýniversitettiń filologiia fakýltetine oqý ádebietiniń myńnan asa danasyn bergen.
Eske salaiyq, buǵan deiin reseilik "Pervyi kanal" efirinde Memlekettik Dýma depýtaty Viacheslav Nikonovtyń Qazaqstan týraly aitqan sózi jelide taraǵan edi. Depýtat efir barysynda Qazaqstan degen el bolmaǵanyn aitty.
"Qazaqstan bolǵan joq, Soltústik Qazaqstanda buryn múlde qonystanbaǵan. Olar bolǵan, biraq ońtústikke jaqyn. Shyn máninde, Qazaqstan territoriiasy - Resei men Keńes Odaǵynyń úlken syilyǵy", - degen edi Nikonov "Bolshaia igra" baǵdarlamasynda.
Keiin Qazaqstan Syrtqy ister ministrligine Resei Federatsiiasynyń Ýaqytsha senimdi ókili Aleksandr Komarov shaqyrylyp, oǵan QR SIM ustanymy kórsetilgen nota tabystaldy. Keiin bul málimdemelerge Resei SIM basshysy Sergei Lavrov túsinik berdi.
