© Sputnik / Aigerim Taýbai
Almatyda 20 qyrkúiekte kisi qolynan qaza bolǵan politsei Darhan Súleevti týystary men áriptesteri aqtyq saparǵa shyǵaryp saldy, dep habarlaidy Sputnik Qazaqstan tilshisi.
Marqumnyń janazasy politsiia maiory bala-shaǵasymen turǵan úide shyǵaryldy.
Politsiia qyzmetkerleri joldyń eki jaǵyna sapqa turyp, marqum áriptesine qurmet kórsetti.
Al marqumnyń artynda bes balasy men bir qaýym el jylap qaldy. Darhan Súleevtiń Amankúl esimdi bólesi marqumnyń baýyrmal bolǵanyn aitady.
"Aqjúrek, aqkóńil, baýyrmal edi. Ishektiń qaterli isigi shyǵyp, úsh jyl boiy aýyrdy. Sodan emdelip, biyl jaqsy bolyp kettim dep qýanǵan edi. Áli de dári iship, himiialyq em alyp júr edi", - deidi bólesi.
Darhan Súleev otbasynda jalǵyz ul bolǵan, tórt qaryndasy bar. Qazir artynda úsh qyz, eki uly qaldy.
"Kishkentaiy eki jasta. Kimge qaldy bes bala? Úlkeni endi 16 jasqa tolǵan. Kolledjdiń 2-kýrsynda aqyly bólimde oqidy. Bul balanyń bárin endi kim baǵady? (...) Bárimiz internet arqyly oqyp-bildik. Tóbemizden jai túskendei boldy. Nege aldymen úiine kelip estirtpedi? Bárimiz kósheden estidik. Sodan keiin de oqiǵanyń qalai bolǵanyn eshkim kelip aitqan joq. Ministrdiń orynbasary (IIM ministriniń orynbasary Murat Baimuqashev – Sputnik) da, ákim de (Almaty ákimi Baqytjan Saǵyntaev – Sputnik) keldi. Kelgennen ne paida?", - deidi áiel.
Onyń sózinshe, týystary ákimdik tarapynan marqum politseilerdiń otbasyna baspana beriletini týraly aqparatty internetten bilgen.
"Úimen qamtamasyz etkeli jatqanyn da internetten oqydyq. Berse, eki bólmeli úi berer. Bes balaǵa ol eki bólmeli úi ne bolady? Ózderi jaldamaly úide turdy, basynda baspana da joq", - dep kúiinishin jetkizdi týysy.
Marqumnyń ózge týystary da qyzmet barysynda politseilerdi oq ótpeitin keýdeshemen qamtamasyz etpegenin aitty.
"Tek jumystyń oryndalǵanyn talap etedi, biraq eshqandai jaǵdai jasamaǵan", - deidi olar.
39 jastaǵy maior Darhan Súleev quqyq qorǵaý organdarynda 18 jyl qyzmet etken.
1982 jyly 4 qańtarda Jambyl oblysy Taraz qalasynda dúniege kelgen. 2002 jyly Ál-Farabi atyndaǵy Qazaq ulttyq ýniversitetin "Quqyqtaný" mamandyǵy boiynsha bitirgen. Politsiia qyzmetinde 2003 jyldyń qańtarynan bastap jumys isteidi.
2020 jyldan 2021 jylǵa deiin Almaty qalasy IID esirtki qylmysyna qarsy is-qimyl basqarmasynyń jedel ýákili, IIM Esbolatov atyndaǵy Almaty akademiiasynyń joǵary oqý ornynan keiingi bilim berý fakýltetiniń magistranty bolǵan.
Almaty politsiia departamenti Alataý aýdanynyń ýchaskelik politsiia inspektory bolyp osy jyldyń tamyzynan bastap jumys istedi.
Ishki ister organdarynda qyzmet etken jyldar ishinde alty ret kótermelengen, onyń ishinde III dárejeli "Ishki ister organdaryndaǵy minsiz qyzmeti úshin" medalimen, sondai-aq "Qazaqstan politsiiasyna 25 jyl" tósbelgisimen marapattalǵan.
Qaitys bolǵannan keiin ishki ister ministriniń qoldaý haty boiynsha Almaty qalasynyń ákimdigi qaza tapqan politsiia qyzmetkerleriniń otbasyna turǵyn úi beretin boldy. Tártip pen zańdylyqty sońyna deiin kúzetken ýchaskelik inspektorlar "Quqyq tártibin qamtamasyz etýge kosqan úlesi úshin" medalimen marapattaldy.
Aita keteiik, 20 qyrkúiekte keshke Almatyda atys boldy. 54 jastaǵy er adam úiden shyǵarý týraly sot sheshimin oryndaýǵa kelgen sot oryndaýshysyna, politsiia qyzmetkerlerine jáne aýlada bolǵan ózge eki adamǵa ańshy myltyǵynan oq jaýdyrǵan. Nátijesinde bes adam qaza tapty. Eki politsiia qyzmetkeri, bir jeke sot oryndaýshysy jáne eki turǵyn. Olardyń biri - úidiń jańa iesi, ekinshisi - onyń tanysy.
1967 jyly týǵan kúdikti ustaldy. Ol 20 jylǵa nemese ómir boiyna deiin bas bostandyǵynan aiyrylýy múmkin.
