Belgili shoýmen Tursynbek Qabatov Instagram paraqshasynda UBT daýyna bailanysty video jariialady, dep habarlaidy "Ult aqparat".
Áleýmettik jelide UBT tapsyrý kezinde zań buzǵan 19 talapkerdiń arasynda shoýmen Tursynbek Qabatovtyń qyzy Ádemi Amanǵali da bar degen aqparat taraǵan bolatyn.
Tanymal ártis Instagram paraqshasynda osy daýǵa bailanysty málimdeme jasady.
Qabatov óziniń, jary men mektep bitirgen qyzynyń bul iske qatysy joq ekenin, barlyǵyn oqýshylardy testke daiyndaityn ortalyq uiymdastyrǵanyn jetkizdi.
«Armysyzdar qurmetti Otandastar! Kesheli beri qyzý talqylanyp jatqan keleńsiz oqiǵanyń shyn mánisinde qalai bolǵany týraly túsindire ketkendi jón sanadym. Ata-ana retinde bul oqiǵa bizge de óte aýyr tiip otyr. Qoldaý bildirip jatqan jandarǵa zor rahmet. Oqiǵa boiynsha aitarym osy videoda», - dep jazdy ol.
Videodaǵy Tursynbek Qabatov pen ózin «Nurbek» dep tanystyrǵan jigittiń áńgimesinde áýel basta eki arada repetitorlyq týraly kelisim bolǵany aitylady. Sóz arasynda Tursynbek Qabatov óziniń UBT-daǵy quityrqy áreket týraly habarsyz bolǵany birneshe ret qaitalap aitqan.
«Kesheden beri ana ortalyqtaryńa bardym. Jeksenbi bolyp, joldaryń bolyp ketti desem bolady senderge. Keshe jai ǵana keshirim surap, video jibere salypsyńdar, betin buldyratyp. Oǵan kim senedi», - degen shoýmen tutqanyń ar jaǵyndaǵy jigitten nege astyrtyn áreketke barǵanyn suraidy.
«Nurbek, sen maǵan mynany túsindirshi. Bolatyn jaǵdaidy nege sen nege maǵan aitpai, anasyna aitpai, ondai tirlikke bardyń? Ekinshi qyz kim? Ony kim taýyp júr, sen be», - dep suraidy.
Tutqanyń ar jaǵyndaǵy daýys UBT-ǵa ártistiń qyzyn ózi daiyndaǵandyqtan, joǵary ball alǵyzyp, «ata-anasyn tosynnan qýantqysy kelgenin» aitqan.
«Ádemi (Ádemi Amanǵali – Tursynbek Qabatovtyń qyzy) jaqsy daiyndalyp júrdi. Erteń UBT kezinde jaqsy ball alyp, sizderdi tosynnan qýantaiyn degen oi bolǵan» dep jaýap berdi ol.
Ári qarai ekeýara áńgimeden Ádemi Tursynbekqyzy Amanǵalidyń UBT kezindegi quityrqy «tásil» týraly testileýge kirer kezde ǵana bilgeni týraly aitylady. Sondai-aq, Tursynbek Qabatov qyzyna o basta UBT-dan joǵary ball jinaý týraly talap qoimaǵanyn, shetelde oqytýdy josparlaǵanyn aitady.
«Ádemige UBT-dan joǵary ball alýdyń qajeti joq ekenin bilesiń ǵoi. Onyń shetelge oqýǵa túseiin dep jyl basynan beri daiyndalyp jatqanyn bilesiń. Men bireýdiń aýzynan jyryp, grantyn julyp alǵym kelip turǵan joq. (...) Qazir mektepke tek kólikpen baryp keletin 17 jastaǵy qyz jalǵan qujat jasap, ornyna basqa qyzdy kirgizip jiberip, ózi UBT-ǵa qatyspaǵan dep jatyr. Kesheden beri áleýmettik jelige de shyǵa almai jatyrmyn. Video jazatyn bolsam, maǵan senbeidi. Ótirik aityp tur deidi», - deidi ol sóz arasynda.
Áńgime sońynda Qabatov endigi máseleni quzyrly organdar sheshetinin, tek túsinbeýshilik saldarynan eldiń aldynda abyroisyz atqa qalǵanyn aityp qynjylady.
«Qatelespeitin adam joq. Maǵan eskertip, aqyldasýyń kerek edi. Qyzym ákesiniń kózine qarap sóilemeitin qyz. UBT-da zańsyz áreketke barmaq túgil, qalany durys bilmeidi. Mektep pen úidiń arasyna máshinemen aparyp, ákelip júrgen bala. Tergeý júrip jatsa, zań bar. Keshirmeidi emes, keshirem ǵoi. Eldiń aldynda abyroiyma nuqsan keldi», - degen shoýmen istiń baiybyna barmai, Ádemi Amanǵalidyń derbes derekteri men sýretin jelige salǵan internet qoldanýshylarǵa renishin bildiredi.
