Nursultan Nazarbaev belgili memleket jáne qoǵam qairatkeri Qajahmet Balahmetovtiń qaitys bolýyna bailanysty onyń otbasy men týǵan-týystaryna kóńil aitý jedelhatyn joldady, - dep habarlaidy "Ult aqparat".
Elbasy belgili memleket jáne qoǵam qairatkeri Qajahmet Balahmetovtiń dúnieden ótýine bailanysty aýyr qaiǵyǵa ortaqtasyp, kóńil aitty.
"Qajahmet Balahmetuly óziniń barlyq sanaly ǵumyryn halyqqa bilim berý isine arnaǵan abzal azamat bolatyn. Ol kezinde uzaq jyldar boiy Qazaq KSR oqý-aǵartý ministri qyzmetin atqaryp, salanyń damýyna zor eńbek sińirdi. Sonymen qatar, qoǵamdyq isterge de atsalysyp, jurtshylyqtyń shynaiy izet-iltipaty men qurmetine bólendi. Jemisti qyzmeti joǵary marapattarmen atap ótildi.
Onyń ónegeli ómiri óskeleń urpaqqa árdaiym úlgi bolyp qala beredi", – delingen jedelhatta.
