Memleket basshysy elordanyń Esil aýdanynda boi kóteretin jańa meshittiń irgetasyn qalady, dep habarlaidy "Ult aqparat" Aqordaǵa silteme jasap.
– Bul jerde sáýletti ári biregei meshit salynady. Búkil Ortalyq Aziiada buǵan teń keler meshit bola qoimas, – dedi jurtshylyq pen buqaralyq aqparat quraldarynyń ókilderi aldynda sóz sóilegen Nursultan Nazarbaev.
Qazaqstan Prezidenti jańa meshit barsha musylman qaýymynyń maqtanyshyna ainalatynyna jáne Astananyń kórikti jerleriniń biri bolatynyna senim bildirdi.
– Bul jobany iske asyrý úshin memlekettik biýdjetten qarajat jumsalmaidy. Qurylys jumystaryn júrgizý úshin arnaiy qor quryldy. Oǵan basqa azamattarymyzdyń da qarjylai atsalysýyna bolady. Táýelsizdik jyldarynda tabysqa jetip, búginde osyndai igilikti iske qol ushyn berip jatqan barlyq kásipkerlerge rizashylyǵymdy bildiremin, – dedi Memleket basshysy.
Nursultan Nazarbaev bul meshittiń Astanaǵa týrister tartatyn jańa ortalyqtardyń biri bolýǵa tiis ekenin atap ótti.
– Meshit – elorda úshin mańyzdy oryn. Biz osyndai nysandardyń bárin zerttep, ishinen eń jaqsy jobany tańdap aldyq. Men onyń júzege asyrylý barysyn ózim qadaǵalap otyramyn. Barshańyzǵa tabys tileimin, – dedi Memleket basshysy.
Aita keteiik, jańa meshittiń jalpy kólemi - 57 myń sharshy metr. Munaralarynyń biiktigi - 130 metr. Kúmbeziniń diametri - 63 metr. Dini keshende islam mýzeii, kitaphana, qolóner sheberhanasy jáne basqa da mekemeler ornalasady.
Bul nysan EKSPO-qalashyqtyń janyndaǵy jańa saiabaq aýmaǵynda boi kóterip, kólemi boiynsha Botanikalyq saiabaqtan da úlken bolady. Qala ákimdiginiń deregi boiynsha, meshittiń syiymdylyǵy - 30 myń adam.
«Bul tek qulshylyq etetin oryn emes, qala qonaqtary men týrister keletin elordanyń kórikti nysandarynyń biri bolady. (...) Men taiaýda BAÁ-de bolyp, altynnan turǵyzylǵan sheih Zaid meshitin kórdim. Bul meshit 3-4 jyl buryn ǵana ashylsa da, oǵan jyl saiyn alty million týrist barady. (...) Alla isimizge bereke bersin», - dedi Nursultan Nazarbaev tas ornatý rásiminde.
Prezident bul nysannyń qurylys barysyn ózi baqylaitynyn málimdedi.
«Astana 2020» qorynyń atqarýshy direktory Nurjan Myńjasarov jýrnalisterge bergen suhbatynda meshittiń tek Ortalyq Aziiada ǵana emes, búkil TMD elderindegi eń úlken meshit bolatynyn, sondai-aq álemdegi osyndai ǵimarattardyń alyp ondyǵyna kiretinin jetkizdi. Onyń sózine qaraǵanda, meshit eki jylda salynyp bitedi.
Aita keteiik, búgin Vkontakte-degi «Astana arhitektýrasy» tobynda alyp ǵimarattyń videoroligi jariialandy.
Eske salaiyq, qazirgi ýaqytta Ortalyq Aziiadaǵy eń úlken meshit sanalatyn Astanadaǵy «Áziret Sultan» meshitiniń aýmaǵy 17 700 sharshy metr. Ony 2012 jyldyń 6 shildesinde ashty.
