«Qazgidromet» RMK málimetinshe, elimizdiń 9 óńirinde eskertý jariialandy, dep habarlaidy QazAqparat Tótenshe jaǵdailar komitetine silteme jasap.
21 mamyr kúni Nur-Sultan qalasynda naizaǵai jarqyldap, jeldiń kúshi sekýndyna 15-18 metrge jetedi.
21 mamyrda Almaty qalasynda taýda kóshkin júrýi múmkin.
21 mamyrda Aqmola oblysynda kei jerlerde kún kúrkirep, daýyl soǵady. Burshaq jaýady. Jeldiń ekpini - sekýndyna 15-20 metr.
Atyraý oblysynda qatty jańbyr jaýyp, naizaǵai oinaidy. Jel qarqyny sekýndyna 15-20 metr bolady.
21 mamyrda Qostanai oblysynda kún kúrkireidi, jel kúsheiedi. Jel jyldamdyǵy - sekýndyna 15-18 metr.
Qyzylorda oblysynda naizaǵai jarqyldaidy, jel sekýndyna 15-18 metrge deiin kúsheiedi.
Mańǵystaý oblysynda shańdy daýyl soǵady, jeldiń ekpini - sekýndyna 15-20 metr.
21 mamyrda Pavlodar oblysynda naizaǵai oinaidy, daýyl soǵady. Burshaq jaýyp, jel kúsheiedi. Jel qarqyny - sekýndyna 15-18 metr.
Soltústik Qazaqstan oblysynda jańbyr jaýady. Naizaǵai jarqyldap, daýyl turady, burshaq jaýady. Jeldiń ekpini - sekýndyna 15-20 metr, kúndiz sekýndyna 25 metrge jetedi.
Tótenshe jaǵdailar komiteti turǵyndarǵa aýa raiynyń kúrt qubylýyn nazardan shyǵarmaýdy suraidy. Daýyldy eskertý týraly habarlamaǵa qulaq asyp, qajetti saqtyq jasaý kerek. Jeldiń jyldamdyǵy sekýndyna 15-20 jáne tipti sekýndyna 30 metrge deiin kúsheiedi.
Eldi mekenderde qaýipsizdik tehnikasynyń basty erejesin ustaný kerek. Shaǵyn qalalar men megapolisterde daýyl kezinde zardap shegý yqtimaldyǵy joǵary bolady. Qatty daýyl soqqanda úidegi barlyq tereze tyǵyz jabylýy tiis. Tolyq jabylmaǵan balkon men lodjiiadan qatty jel kezinde syrtqa ushyp ketýi múmkin barlyq zatty (qumyra, jáshik, shólmek jáne t.b.) alyp tastaý kerek.
Turǵyn úi buryshyndaǵy balkondarda daýyl kezinde ramasymen birge terezesi ushyp ketken jaǵdai kezdesedi. Kóshede daýyl turǵan kezde jarnama qalqandary (jáne basqa da aspaly qurylymdar), avtobýs aialdamasy, elektr baǵanasy men jelisi, sondai-aq aǵashtardan barynsha alys turyńyz.
Ainalańyzǵa saq bolyńyz, ústige qulap ketýi múmkin zattardan alshaq bolýyńyz. Úzilgen symdar men qulaityn zattarǵa (aǵashtarǵa) jaqyndaýǵa bolmaidy. «Qatty jel soqsa ol tyiylǵansha jaqyn mańdaǵy ǵimaratta nemese tabiǵi yqtasynǵa jasyryný qajet.
Úlken aǵashtyń, ásirese terektiń astyna kólik qoiýǵa bolmaidy, óitkeni aǵash nemese onyń iri butaǵy qulap basyp qalýy múmkin. Shirigen jáne kári, sondai-aq jalǵyz turǵan aǵashtar da óte qaýipti.
«Úiden shyqpańyzdar, jaqyndaryńyzdy qorǵańyzdar» dep eskertedi komitet.
