Qazaqstannyń Syrtqy ister ministrligi reseilik reper Navai (Navai Bakirov) ustalǵannan keiin Reseidiń Almatydaǵy bas konsýldyǵynan nota túskenin rastady. Diplomattar mýzykanttyń ustalý mán-jaiy týraly resmi aqparat suraǵan, dep habarlaidy ult.kz.
SIM málimetinshe, mundai nota konsýldyq jumystaǵy qalypty rásim sanalady. Ministrlik Resei tarapynyń saýalyna bailanysty Qazaqstannyń quqyq qorǵaý organdaryna tiisti suraý joldaidy.
Navai 13 qazanda «Qordai» shekara beketinde ustalǵan. Politsiianyń habarlaýynsha, ol mingen kólikti tekserý kezinde esirtki zaty tabylyp, tárkilengen. Oqiǵaǵa politsiia men shekara qyzmetiniń qyzmetkerleri birlesip qatysqan.
Mýzykantqa qatysty esirtki kontrabandasy jáne zańsyz saqtaý derekteri boiynsha sotqa deiingi tergeý bastalǵan. Keiin sot ony eki aiǵa qamaýǵa alý týraly sheshim shyǵarǵan.
Oqiǵaǵa bailanysty Qyrǵyzstannyń Shekara qyzmeti de tekserý bastaǵan. Vedomstvo ártistiń «Aq-Jol» ótkizý pýnkti arqyly ótýine qatysty zań buzýshylyqtar anyqtalsa, kináli laýazymdy tulǵalarǵa tiisti shara qoldanylatynyn málimdedi.
Ustalý oqiǵasy reperdiń kontserttik josparyna da áser etti. 14 qazanǵa josparlanǵan Astanadaǵy kontserti belgisiz merzimge aýystyryldy. Uiymdastyrýshylar muny tehnikalyq sebeptermen túsindirgen. Kontserttiń aýystyrylýy jankúierler arasynda narazylyq týǵyzdy.
