Foto: gov.kz
2 naýryzdan bastap turǵyn úi kezeginde turǵan azamattarǵa baspana bólý jáne jeńildetilgen nesie berý tártibi ózgeredi. Endi "Otbasy bank" páterlerdi tek derekteri mindetti túgendeýden ótken azamattarǵa ǵana usynady. Bul týraly Qarjy institýty habarlady.
Institýtynyń málimetinshe, túgendeý rásimi kezekte turǵan azamattardyń derekteriniń ózektiligin tekserýge baǵyttalǵan. Atap aitqanda, otbasy quramy, sanaty jáne turǵyn úiiniń bar-joǵy qaita qaralady. Ol úshin azamattar arnaiy portal arqyly rásimnen ótip, derbes derekterin óńdeýge kelisim berýi tiis.
Eger azamat túgendeýden ótpese, ol turǵyn úige muqtajdar tiziminen shyǵarylmaidy. Alaida derekteri naqtylanǵanǵa deiin bank jaldamaly baspana usynbaidy jáne jyldyq 2 nemese 5 paiyzdyq mólsherlememen jeńildetilgen nesie bermeidi.
Buǵan deiin ýaqytsha tártip qoldanylǵan. Jańa júieni jedel iske qosý maqsatynda páterler aldymen túgendeýsiz bólinip, keiin azamattardyń málimeti tekserilgen. Sonyń saldarynan birqatar qiyndyqtar týyndaǵan.
Bank ókilderiniń aitýynsha, kei jaǵdailarda túgendeý barysynda kezekte turǵan azamattyń buryn baspana satyp alǵany anyqtalǵan. Sondai-aq otbasy quramynda ózgeris bolyp, bala sany artqanyna qaramastan shaǵyn páter bólingen jaǵdailar kezdesken. Mundai kezde qujattardy qaita rásimdeýge týra kelgen.
Qazirgi ýaqytta "Otbasy bank" turǵyn úidi ulttyq damý institýty mártebesinde bóledi. Oblys ákimdikteri bankke 13 393 páter tapsyrǵan: onyń 8 846-sy jaldamaly turǵyn úige, 4 547-si nesielik baspanaǵa arnalǵan. Páter bólý bastalǵaly beri 4 216 otbasy baspanaly bolǵan.
24 aqpandaǵy derek boiynsha, 257 myń azamat túgendeý rásiminen ótken.
Jańa tártip turǵyn úidi ádil bólýge jáne kezekte turǵan azamattardyń naqty jaǵdaiyn eskerýge múmkindik beredi.
