Foto: Norma.uz
Elimizde basym sport túrlerin aiqyndaýdyń jańa tásili bekitildi. 2025 jylǵy 16 maýsymda kúshine engen «Qazaqstan Respýblikasynyń keibir zańnamalyq aktilerine dene shynyqtyrý jáne sport máseleleri boiynsha ózgerister men tolyqtyrýlar engizý týraly» Zańda elimiz úshin basym sport túrlerin anyqtaýdyń jańa tásili kózdelgen, dep habarlaidy Ult.kz.
Bul qujat Memleket basshysy bastamashy bolǵan sport salasyndaǵy aýqymdy reformanyń bir bóligi sanalady.
Buǵan deiin basym sport túrleriniń tizimi kóbine sýbektivti baǵalaýǵa nemese jekelegen sport túrleriniń tanymaldyǵyna negizdelip jasalatyn. Endi irikteýdiń basty ólshemi retinde ulttyq quramalardyń Olimpiada, Paralimpiada, Sýrdlimpiada, Aziia jáne Para Aziia oiyndaryndaǵy nátijeleri esepke alynady.
Qazirgi tańda Týrizm jáne sport ministrligi 60-tan astam basym sport túrin aiqyndady. Onyń shamamen 30-ǵa jýyǵy elimizdiń barlyq óńirinde damytylady. Zańda sonymen qatar óńirlik deńgeide basym sport túrlerin bekitý múmkindigi qarastyrylǵan. Bul rette óńirdiń sporttyq dástúrleri, infraqurylymy men kadrlyq áleýeti eskeriledi. Mundai ikemdi model resýrstardy tiimdi bólýge ári sportty eldiń barlyq óńirinde damytýǵa jol ashady.
Qujattaǵy mańyzdy jańalyqtardyń biri – «múgedektigi bar sportshyny súiemeldeýshi» uǵymynyń engizilýi. Jańa ereje birinshi top múgedektigi bar sportshylarǵa sporttyq is-sharalarǵa qatysý kezinde resmi súiemeldeý qyzmetin paidalanýǵa múmkindik beredi.
Búginde elimizde múgedektigi bar 700 myńǵa jýyq adam turady, onyń ishinde 98 myńnan astamy – balalar. Súiemeldeýshige resmi mártebe berý – otandyq sportshylardy zańnamalyq turǵyda qoldaý, olardyń infraqurylymǵa qoljetimdiligin jeńildetý jáne inkliýzivti sportty damytý baǵytyndaǵy mańyzdy qadam sanalady.
