Búgin mádeniet jáne sport ministrliginiń uiymdastyrýymen ulttyq dombyra kúnine arnalǵan onlain formatta merekelik kontsert ótedi. Kontsert QAZAQSTAN telearnasynan tikelei efirde kórsetiledi.
2018 jyly 13 maýsymda Tuńǵysh Prezident – Elbasy Nursultan Nazarbaev ulttyq dombyra kúnin shildeniń alǵashqy jeksenbisinde atap ótý týraly jarlyqqa qol qoidy.
Dombyra - qazaq halqynyń rýhani murasy men bai dástúriniń nyshany. Ǵasyrlar boiy ol qýanyshta da, sherli kúnder men jeńisti kúnderde halqymyzdyń janynda.
Urpaqtan-urpaqqa dombyra pernesinen kúmbirlegen kúi arqyly bizdiń mádeni qundylyqtarymyz, saltymyz ben ańyzdarymyz kelip jetken.
Osy dástúrdiń jalǵasy retinde 4 shilde, saǵat 11:00-de televiziialyq túsirilim formatynda QAZAQSTAN telearnasynda "Ulttyq dombyra" kúni aiasynda "Naǵyz qazaq emes, naǵyz qazaq - dombyra" kontserti ótedi.
Kontsertte Qurmanǵazy atyndaǵy Qazaq akademiialyq halyq aspaptar orkestri, N. Tilendiev atyndaǵy "Otyrar sazy" etnofolklorlyq orkestri, Táttimbet atyndaǵy akademiialyq filarmoniiasynyń halyq aspaptarynan quralǵan jiyntyq orkestr men elimizdiń dástúrli ónerpazdary sahnaǵa shyǵady.
Ulttyq dombyra kúninde respýblikamyzdyń 17 óńirinen kelgen táýelsizdik qurdastarynan quralǵan 30 dombyrashy táýelsizdiktiń mereili 30 jyldyǵyna kúiden shashý shashady.
Qala turǵyndary men qonaqtaryna alǵashqy ret dombyra kúnine arnaiy syilyq retinde EHRO ortalyǵy alańynda kúi mektepteriniń kórnekti tulǵalarynyń kúilerin uialy telefonmen QR-kod arqyly júktep alyp tyńdaýǵa bolatyn aqparattyq stendter ornatylady.
EHRO ortalyǵy alańynda aspan astyndaǵy sahnada Qazaqstannyń eńbek sińirgen artisteri Seken Turysbekov, Aigúl Úlkenbaeva, Qazaqstannyń eńbek sińirgen qairatkerleri Batyrjan Myqtybaev, Nurken Áshirov syndy dáýlesker kúishilerimiz ataqty kúishi babalarymyz Qurmanǵazy, Qazanǵaptan bastap Qazaqstan kompozitorlarynyń kúmbirlegen kúiinen shashý shashyp, Qazaqstannyń eńbek sińirgen artisi Ramazan Stamǵaziev, Qazaqstannyń eńbek sińirgen qairatkerleri Sáýle Janpeiisova, Elmura Jańabergen, Ardaq Balajanova, Erlan Rysqali syndy kúmis kómei ánshiler án shyrqaidy.
"Naǵyz qazaq qazaq emes, naǵyz qazaq dombyra" atty án men kúi tógilgen kontsertte jas oryndaýshylar – halyqaralyq jáne respýblikalyq konkýrstardyń laýreattary óner kórsetedi.
