Elimizde koronavirýstyń taralýyna jol bermeý úshin tótenshe jaǵdai engizilgennen keiin KAZ Minerals toby birden tiisti sharalardy qabyldady. Kompaniia qaramaǵyndaǵy kásiporyndardyń qalypty jumysyn qamtamasyz etetin qyzmetkerler ǵana qalyp, qalǵandary qashyqtan jumys isteýge kóshken. Bul jaily KAZ Minerals toby korporativtik departamentiniń menedjeri Ermek Dúzkenov aityp berdi, dep habarlaidy QazAqparat.
KAZ Minerals – Qazaqstan, Qyrǵyzstan jáne Reseidegi karerlik tiptegi taý-ken óndirisin damytýǵa baǵyttalǵan iri mys óndirýshi kompaniia. Óz jumysyn ShQO-daǵy Aqtoǵai men Pavlodar oblysyndaǵy Bozshakól ashyq kenishterde, sondai-aq Shyǵys Qazaqstanda ornalasqan 3 kenish pen 3 ken baiytý fabrikacynda jáne Qyrǵyzstandaǵy Bozymshaq mys-altyn kenishinde júrgizedi. 2019 jyly mystyń jalpy óndiris kólemi 311 myń tonnany quraǵan.
«Eldegi tótenshe jaǵdaiǵa orai biz keńseler men kásiporyndarǵa bógde adamdardyń kirýine tyiym saldyq. Barlyq alys-beris zattar men qujattar tekserý-ótkizý ornynda qabyldanyp, tapsyrylýda. Kásiporyndardyń qalypty jumysyn qamtamasyz etetin qyzmetkerler ǵana qalyp, qalǵandary qashyqtan jumys isteýge kóshken. Olar qajetti tehnikalarmen jáne baǵdarlamalarmen qamtamasyz etildi», - deidi Ermek Dúzkenov.
Onyń aitýynsha, kásiporyndar burynǵy qarqynmen jumys isteýde. Kúnine birneshe ret dezinfektsiialaý sharalary júrgizilip, jumysshylarǵa antiseptikter men maskalar taratyldy.
«Tipti kompaniia boiynsha qol alysyp sálemdesýge tyiym salyndy. Aqtoǵai men Bozshakól siiaqty vahtalyq kásiporyndardaǵy qyzmetkerlerdiń kezekshiligi TJ aiaqtalǵansha sozyldy. Olarǵa eńbekaqylary eki eselenip tólenedi. Vahtaaralyq demalysta bolyp, joldar jabylǵannan keiin kele almai qalǵan qyzmetkerler bazalyq jalaqysyn alyp otyrady. Qazirgi ýaqytta jumysshylar arasynda koronavirýs infektsiiasynyń belgileri bar adamdar tirkelmegen», - deidi kompaniia ókili.
KAZ Minerals toby Elbasy Nursultan Nazarbaevtyń qiyn jaǵdaiǵa tap bolǵan otandastarymyzǵa kómek kórsetý qajettigi jaily bastamasyna qoldaý bildirdi. Búginde kompaniia «Birgemiz» qoǵamdyq qoryna 2,2 mlrd teńge aýdarǵan.
