«QazMunaiGaz» UK AQ basqarma tóraǵasy Maǵzum Myrzaǵaliev Prezident Qasym-Jomart Toqaevqa Jańaózendegi ahýalǵa qatysty baiandady, dep habarlaidy QazAqparat.
«Men qazir Memleket basshysyna Jańaózendegi ahýalǵa qatysty da baiandadym. Biz eki apta buryn Aqtaý qalasynda «QazMunaiGazdyń» ókildigin arnaiy ashqan edik. Bul keńseniń negizi baǵyty men maqsaty - halyqpen jumys isteý, halyqtyń, sonymen qatar kásiporyndardyń saýaldaryn qarastyrý, óndiristik kórsetkishterdi kúsheitý. Ókinishke orai, jyl basynan beri Ózen ken ornyndaǵy munai óndirý kólemi josparly kórsetkishterden kem bolyp otyr. Iaǵni, bizdiń kún saiyn óndirý kólemimiz 1 000-1 200 tonnaǵa tómen. Sondyqtan osy baǵytta jumysty kúsheite bastadyq», - dedi Maǵzum Myrzaǵaliev Prezident qabyldaýynan keiin.
Sonymen qatar ol Memleket basshysyna munai-gaz himiiasy keshenin damytý jaiynda jetkizgenin aitty.
«Tamyzdyń 20-syna qarai Atyraý qalasyndaǵy iri polipropilen shyǵaratyn zaýyt ashylady. Qazirgi ýaqytta sońǵy jumystary júrgizilýde. Bul zaýyt ashylǵannan keiin 500-den astam jańa jumys orny qurylady. Bul osy óńirdegi eń iri zaýyttardyń biri sanalady. Onyń óndiristik qýaty jylyna 500 tonna propilendi quraidy», - dedi ol.
Maǵzum Myrzaǵalievtiń atap ótýinshe, «QazMunaiGaz» qazirgi ýaqytta eki jobamen ainalysyp jatyr.
«Birinshisi - polietilen shyǵaratyn zaýyt. Bul zaýyttyń jyldyq qýaty 1 mln 250 myń tonna polietilendi quraidy. Ol da Atyraý qalasynda ornalasqan. Ekinshi joba - býtadien shyǵaratyy zaýyt. Bul joba da kompaniianyń strategiialyq seriktesterimen pysyqtalyp jatyr», - dedi kompaniia basshysy.
