Nur-Sultanda júrgizýshi kýáligin alýǵa qujat tapsyrǵan 2 myńnan astam adamnyń tek 30-y ǵana emihandy sátti tapsyrǵan.
Bul týraly búgin óziniń Instagram paraqshasynda Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin jazdy, dep habarlaidy "Ult aqparat".
«Brifing barysynda jýrnalisterge avto-HQKO qyzmetin tekserý úshin qyrkúiekte jasyryn, iaǵni qarapaiym klient retinde júrgizýshi kýáligin alýǵa baryp, biraz zańsyzdyqqa tap bolǵanymdy aitqan edim jáne keiin osy tekseristiń nátijesimen bólisýge sóz berdim.
«Azamattarǵa arnalǵan úkimettegi» ishki qaýipsizdik qyzmetiniń mamandary jasaǵan videonyń negizinde osy mańyzdy másele boiynsha shuǵyl is-sharalar qolǵa alyndy.
Qazirgi tańda memlekettik korporatsiiadaǵy áriptesterim kúlli el boiynsha baqylaý jumystaryn kúsheitkendikten, mundai jaǵdailar basqa da aimaqtarda anyqtalyp jatyr.
Bul baǵyttaǵy barlyq materialdar quqyq qorǵaý organdaryna joldanady.
Tekseris bastalǵannan beri kúndelikti statistikaǵa kóz júgirtip otyramyn. «Pravaǵa» praktikalyq jáne teoriialyq emtihandy sátti tapsyrǵandardyń sany birden azaiǵanyn baiqaýǵa bolady. Máselen, Nur-Sultan qalasynda sońǵy eki aptada júrgizýshi kýáligin alý boiynsha 2160 ótinish túsken, sonyń ishinde tek 30 adam ǵana synaqtan súrinbei ótken.
Aldaǵy ýaqytta barlyq mamandandyrylǵan HQKO-da teoriialyq emtihandy tapsyrý kezinde tulǵany arnaiy biometriialyq taný júiesin engizemiz. Bul júie synaqqa kelgen adamnyń jeke tulǵasyn anyqtap, test tapsyrýshylardy kezdeisoq orynǵa jaiǵastyrýǵa múmkindik beredi. Ár jumys ornyna kamera ornatylady. Mundai júie qazir pilottyq tártipte qoldanylyp jatyr» - dep jazdy ol óz paraqshasynda.
