Foto: ashyq derekkóz
Aqyn Muhtar Shahanovtyń burynǵy áieli, belgili ǵalym, pedagog Rozalinda Áshirbaiqyzy Shahanova dúnieden ótti. Qaraly habardy Qazaq ulttyq qyzdar pedagogikalyq ýniversitetiniń baspasóz qyzmeti jetkizdi, dep habarlaidy Ult.kz.
Rozalinda Shahanova – 1951 jyly Pavlodar qalasynda dúniege kelgen. QyzPU-dyń «Orys tili men ádebieti» mamandyǵyna túsip, ony 1974 jyly támamdaǵan. Bes jylǵa jýyq orta mektepte tárbieshi jáne orys tili men ádebieti muǵalimi bolyp jumys istegen.
Ǵylymǵa shynaiy bet burǵan Rozalinda Shahanova 1990 jyly kandidattyq dissertatsiiasyn tabysty qorǵap shyqqan. 1993 jyly «Qazaq tili men ádebieti» mamandyǵy boiynsha ekinshi joǵary bilim týraly diplom alǵan. Sonymen qatar sol jyly dotsent ǵylymi ataǵyna ie boldy.
2004 jyly tájiribeli de joǵary bilikti maman retinde QyzPU-ǵa qyzmetke shaqyrylyp, 2008 jylǵa deiin oqý-ádistemelik jumys jónindegi prorektor laýazymyn atqarǵan.
Rozalinda Shahanova birqatar oqý jáne oqý-ádistemelik quraldar men kóptegen ǵylymi maqalalardyń avtory. Onyń ǵylym men bilim berýdegi isin jalǵastyrýshy izbasarlary da az emes.
Ǵylym men bilim berý salasyna qosqan zor úlesi úshin «QR Bilim berý isiniń úzdigi», «Joǵary oqý ornynyń úzdik oqytýshysy» siiaqty ataqtarǵa, QR Ǵylym jáne bilim berý ministrliginiń «Ǵylymnyń damýyna qosqan úlesi úshin», «Y. Altynsarin», QyzPU damýyna qosqan úlesi úshin «Qurmet» medaline jáne taǵy basqa da kóptegen marapattarǵa ie bolǵan.
Rozalinda Áshirbaiqyzy ózine alǵash ǵylym esigin ashqan QyzPU-men ómiriniń sońyna deiin bailanysyn úzbegen. Jyl saiyn memlekettik emtihan komissiiasyna tóraǵalyq etip júrdi.
"Ómiri ónegeli, ǵylymi jáne aǵartýshylyq murasy mol Rozalinda Áshirbekqyzy Shahanovanyń jarqyn beinesi eshqashan umytylmaq emes. Marqumnyń jatqan jeri jaily, topyraǵy torqa bolsyn", - delingen ýniversitet habarlamasynda.
