«Jalyn» jýrnalynyń bas direktorynyń orynbasary Qudiiar Bilál QazAqparat tilshisine telefon arqyly taiaýda ǵana aýrýhanadan shyqqan Muhtar Shahanovtyń jaǵdaiy týraly aityp berdi. Osy aida 78 jasqa tolǵan aqyn qazir úiinde em alyp jatyr.
«2 shilde kúni – Muhtar aǵamyzdyń týǵan kúni. Jylda redaktsiia qyzmetkerleri aǵamyzdyń týǵan kúnin atap ótip, shai ishetinimiz bar. Biyl da sol dástúr boiynsha dastarhan basyna jinalǵanbyz. Biraq Muqańnyń mazasy bolmai otyrdy. Ákimdikten de quttyqtaý kelgen bolatyn. Olarǵa da kóńil aýanyn bildire qoimai, jalpy mazasyz otyrdy. Jeńgemiz de eki kúnnen beri osy kúide júrgenin aitty. Aýyryp otyrǵanyn bildik. Biraq jai tumaý dep oilaǵanbyz», - degen Qudiiar Bilál sol kúni keshkisin jedel járdem shaqyrylǵanyn aitady.
Aýrýhanaǵa jetkizilgennen keiin dárigerler Muhtar Shahanovtyń ókpesiniń qabynǵanyn anyqtaǵan.
«Sóitip «Qalqamandaǵy» aýrýhanaǵa alyp ketti. Bizde ishke kirgizbedi. Habarlasyp turdyq. Biraq emdeý protsesine kóńili tolmaitynyn ańǵartyp, aýrýhanadan shyǵamyn dep mazasyzdyq bildire bastady. Jalpy Muqań minezdi adam ǵoi. Tike aitady. Dese de dárigerlermen sóilesip, onyń aýrýhanadan shyǵýyna múmkindik bermedik. Biraq kúnder óte kele Muqańnyń daýysy báseńdep, emdeýshi dárigerler onyń tamaq ishpeitinin aitty. Kóńiline jaqpaǵan bir nárse boldy ma, joq basqa ma – áiteý emdeý oń nátije bergen joq. «Shyǵaryńdar» degendi aita beredi. Osy jaǵdaiǵa bailanysty memlekettik turǵyda qamqorlyqqa alý týraly Prezidentke ashyq hat jazdym», - deidi ol.
Qudiiar Bilál sol hattan Prezident qulaǵdar boldy dep oilaitynyn jetkizdi.
«Sodan aǵamyz aýrýhanadan óz betinshe shyǵyp ketti. Bizge aitylmaidy ǵoi. Eki kún úide emdelgennen keiin joǵary deńgeidegi qamqorlyqqa alynyp, Muqańdy infektsiialyq aýrýhanaǵa alyp ketti. Sol jaqta em qabyldai bastady. Habarlassaq ázildep «kúnine elý ýkol salady» deidi. Em qalypty júrip jatyr dep, kóńili ornyqqan sekildi. Sol jerge barǵannan keiin birden beti beri qarai bastady. Baryp syrttai tildesip júrdik. Qasyndaǵy kisilermen de, dárigerlermen de sóilesip turdyq. Tártip qatań eken. Dárigerlerdiń kiim kiisi, tártip, emdeý sharalaryn bárin syrttai baqylap, ondaǵy jumystar memlekettik turǵyda jasalǵan úlken is-shara ekenin sezinesiń. Kóresiń. Úlken jumys jasalyp jatqanyn uǵasyń. Ol jerdegi qamqorlyqtyń da, múmkindiktiń de joǵary ekenin bildik», - deidi Qudiiar Bilál.
Qudiiar Bilál aýrýhanada jatqan basqa da adamdardyń tereze arqyly tildesip, jaǵdaiyn surapty.
«Bári de rizashylyǵyn bildirip, qýanyp, shyǵamyz dep jatty. Barǵannan keiin jýrnalist bolǵannan keiin bilip qalaiyn dep jatyrmyn ǵoi baiaǵy. Muqań da sol qamqorlyqtyń arqasynda aman-esen úiine oraldy. Qazir aǵamyzǵa «jata beresiz be, jumysqa qashan shyǵasyz» dep ázildeimiz. Ázirshe úiinde em qabyldap jatyr. Dúisenbide redaktsiiaǵa bir kelip ketedi», - dep túidi Qudiiar Bilál.
