Elordada Mádeniet jáne sport ministrliginiń uiymdastyrýmen «Abai taǵylymy – Táýelsizdiktiń tiregi» atty respýblikalyq aqyndar aitysy máresine jetti, dep habarlaidy "Ult aqparat".
Aitys – qazaq rýhaniiatynyń altyn qazynasy, mádeni murasy. Ǵasyrdan ǵasyrǵa, atadan balaǵa jáne zamannan zamanǵa ulasyp kele jatqan asyl mura, óz boiyna ónerdiń birneshe túrin qamtyǵan janr retinde jas aqyn-jyrshylardyń tájiribe mektebi. sy kieli murany nasihattap, talantty jastarymyzdyń sheberligin shyńdaýǵa yqpal etý maqsatynda Mádeniet jáne sport ministrligi atalmysh respýblikalyq aqyndar aitysyn ótkizdi.
3-4 qarasha kúnderi aitystyń irikteý kezeńine qatysqan 10 juptyń, iaǵni 20 aqynnyń ónerin tamashalap, qazylar alqasynyń sheshimine sáikes jartylai finalǵa 8 aqyn (4 jup) ótken bolatyn. Aitystyń aqtyq máresine halyqaralyq jáne respýblikalyq aitystardyń jeńimpazdary, «Altyn dombyra» iegerleri Muhtar Niiazov, Serik Qýanǵan, Erkebulan Qainazar, Jansaia Mýsina, Meiirbek Sultanhan, Qazyret Berdihan, Bekarys Shoibekov, Aibek Qaliev qatysty.
Jyr dodasynda bas júldege Syr súleii Muhtar Niiazov ie boldy. Osylaisha ol úshinshi ret «Altyn dombyra» iegeri atanyp otyr. Odan bólek I oryn Bekarys Shoibekovke buiyryp, ol «Aitystyń aqtańgeri» tósbelgisimen marapattaldy. II oryn Erkebulan Qainazarov alsa, III orynnan Serik Qýanǵan kórindi.
Atalǵan dúbirli dodany ádilqazy alqasyna kórnekti óner qairatkeri, ustaz, Qazaqstan jáne KSRO Halyq ártisi, «Otan», «Qurmet», «Qazaqstannyń Eńbek Eri» ordenderiniń iegeri Asanáli Áshimov tóraǵalyq etti. Aitysty Qazaqstannyń Eńbek sińirgen qairatkeri, Qazaqstan aitys aqyndary men jyrshy termeshilerdiń halyqaralyq odaǵynyń Tóraǵasy Júrsin Erman júrgizdi.
Álemde jáne elimizde oryn alǵan epidemiologiialyq ahýalǵa orai, respýblikalyq aitys túsirilimi kórermendersiz ótti.
