Elordada «Nur Otan» partiiasynyń qoldaýymen Qazaqstan múgedekter konfederatsiiasy uiymdastyrǵan «Jan Shýaq» qoǵamdyq syilyǵynyń laýreattaryn saltanatty marapattaý rásimi ótti. Atalǵan syilyq jyl saiyn qoǵamdyq jumystarǵa belsene aralasqan múmkindigi shekteýli jandarǵa jáne erekshe qajettilikteri bar adamdardyń ómir súrý sapasyn jaqsartýǵa úles qosqan azamattarǵa beriledi, dep habarlaidy "Ult aqparat" partiianyń baspasóz qyzmetine silteme jasap.
«Nur Otan» Tóraǵasynyń Birinshi orynbasary Baýyrjan Baibek atap ótkendei, erekshe qajettilikteri bar adamdarǵa qoldaý kórsetý – árqashan bileýshi partiia jumysyndaǵy basymdyqtardyń biri. Búginde elimizde erekshe qajettilikteri bar 700 myńnan astam azamat turady, onyń 14%-y – 18 jasqa deiingi balalar.
«Elbasy, partiia Lideri Nursultan Nazarbaevtyń tapsyrmasy boiynsha osy baǵyttaǵy jumysty júieleý maqsatynda biz 2014 jyly «Kedergisiz keleshek» partiialyq jobasyn iske qostyq. Jobanyń arqasynda erekshe qajettilikteri bar 40 myńǵa jýyq azamat jumysqa ornalastyryldy, 24 myńnan astam áleýmettik nysanynda erekshe qajettiligi bar adamdar úshin beiimdeý jumystary júrgizilip, zańnamaǵa ózgerister engizildi, «Bolashaq» qorynyń qoldaýymen 43 inkliýzivti bilim berý kabineti ashyldy. Nursultan Nazarbaev Qory qomaqty jumys atqarýda. Memleket basshysy Qasym-Jomart Toqaev partiianyń sailaýaldy baǵdarlamasy aiasynda taǵy 22 myń áleýmettik infraqurylym nysanyn beiimdeý, erekshe qajettilikteri bar adamdardy jumysqa ornalastyrý baǵytyndaǵy isterdi jalǵastyratyn bolady», - dedi Baýyrjan Baibek.
Partiia baspasóz qyzmetiniń aqparatyna sáikes, «Nur Otan» «Barlyq balaǵa – birdei múmkindik» qaǵidasyn júzege asyra otyryp, elimizdegi barlyq kolledjder men joǵary oqý oryndarynda, sondai-aq mektepter men mektepke deiingi uiymdardyń 70%-ynda inkliýzivti bilim berýdi engizýdi qamtamasyz etpek. Ońaltý ortalyqtarynyń sany ulǵaitylyp, erekshe qajettilikteri bar balalardy psihologiialyq-pedagogikalyq jáne korrektsiialyq qoldaý boiynsha memlekettik tapsyrys engiziledi. Asyraýshysynan aiyrylǵan balalar bir mezgilde múgedektigine jáne asyraýshysynan airylýyna bailanysty 2 járdemaqy alatyn bolady.
Sondai-aq, partiia zaǵip jáne nashar kóretin azamattarǵa arnalǵan kitaphanalardy, onyń ishinde memlekettik tildegi kitaptar qoryn keńeitýge, ymdaý tiline onlain aýdarý úshin arnaiy baǵdarlamalardyń qoljetimdiligin qamtamasyz etýge nietti. Turaqty kútimdi qajet etetin jáne jeke kómekshiniń qyzmetin paidalanbaityn múgedektiktiń birinshi toby bar barlyq azamattarǵa qosymsha áleýmettik járdemaqy beriledi. Bul rette 2025 jylǵa qarai múgedektigi bar adamdar 100% qajetti tehnikalyq quraldarmen jáne ońaltý qyzmetterimen qamtamasyz etiledi.
«Búgin sizderdiń eńbekterińiz týraly zor maqtanyshpen aita otyryp, ózderińizge qurmet kórsetemiz. Sizder qoǵamdaǵy árqaisymyz úshin úlgi bolýǵa laiyqsyzdar. Bizdiń ortaq mindetimiz – erekshe qajettilikteri bar adamdar úshin júieli jaǵdai jasaý. Ózderińiz biletindei, Memleket basshysy óz Joldaýynda partiianyń sailaýaldy tizimderinde erekshe qajettilikteri bar adamdar úshin arnaiy kvota engizýdi tapsyrǵan bolatyn. Iaǵni, máseleni egjei-tegjeili biletin, onymen kún saiyn ushyrasyp, óz basynan ótkerip otyrǵan adamdar osy baǵyttaǵy tiisti zańdardy qabyldaidy jáne atqarýshy organdardan osy máselelerdi sheshýdi talap etedi», - dep atap ótti Baýyrjan Baibek.
Óz kezeginde Qazaqstan múgedekter konfederatsiiasynyń prezidenti Janat Omarbekova «Jan shýaqty» tapsyrý rásimi 2008 jyldan beri ótkizilip kele jatqanyn jáne osy jyldar ishinde syilyqqa 70-ten astam adam ie bolǵanyn atap ótti. Biyl 17 óńirden 58 adam usynylyp, olardyń ishinen ashyq daýys berý nátijesinde uiymdastyrý komissiianyń sheshimimen 7 úzdik nominant anyqtaldy.
«Búginde erekshe qajettilikteri bar 13 myńnan astam adam – «Nur Otan» partiiasynyń múshesi. Bileýshi partiiamen birlesken júieli jumystyń arqasynda Qazaqstan múgedekter konfederatsiiasy Parlament Májilisinde ókildik etedi. Árbirińizge alǵys aitqym keledi, sebebi marapatqa ie bolmaǵandar da qoǵamnyń nazaryn erekshe qajettilikteri bar adamdardyń máselesine aýdarýǵa, áleýmettik kedergilerdi joiý isine óz úlesin qosty. Bizdiń ortaq maqsatymyz – múgedektigi bar adamdardy áleýmettendirýge yqpal etý, tulǵa retinde damý úshin jańa múmkindikter ashý, olardyń alǵa umtylýyna qoldaý kórsetý jáne qoǵamǵa paidaly bolý», - dedi Janat Omarbekova.
Sonymen, «Myqty erik-jigeri jáne jeńiske degen umtylysy úshin» nominatsiiasy boiynsha alpinist, halyqaralyq dárejedegi sport sheberi Mariia Áýezova marapattaldy. Biyl ol Everest bazalyq lagerinde 5364 m jáne Kala Pathar taýynda 5640 m biiktikti baǵyndyrdy.
«Erekshe qajettilikteri bar adamdarǵa qatysty qoǵamdyq sananyń oń ózgeristerine qosqan úlesi úshin» syilyǵynyń iegeri qoǵam qairatkeri Niiaz Súndetáliev boldy.
«Erekshe qajettilikteri bar adamdardyń problemalary men ómirin aqparattyq qamtýǵa qosqan úlesi úshin» nominatsiiasy boiynsha syilyqty tanymal bloger Almas Erjan aldy.
«Eriktiler qozǵalysyn damytýdaǵy jetistikteri úshin» músinsheniń iegeri qoǵam qairatkeri Gúlnaz Qosmýrzieva boldy. Ol pandemiia kezinde qarajat jinaýdy uiymdastyryp, 2 myńnan astam muqtaj janǵa kómek kórsetti.
«Kásipkerlik belsendilikti damytýǵa qosqan úlesi úshin» nominatsiiasy boiynsha syilyqty erekshe qajettiligi bar balanyń anasy Gúlmira Parmysheva ielendi. Ol erekshe balalarǵa arnalǵan damytý oiynshyqtaryn shyǵaratyn «Kishkentai» jobasyn iske qosqan.
«Óner jáne mádeniet salasyndaǵy úzdik jetistikteri úshin» syilyǵynyń iegerleri bolyp «Biz sizderdi jaqsy kóremiz!» halyqtyq kloýndar teatry tanyldy. Teatr trýppasy estý qabileti buzylǵan ártisterden turady.
«Sport salasyndaǵy úzdik jetistikteri úshin» atalymynda paýerlifting boiynsha sportshy, 2016 jylǵy Rio-de-Janeiroda ótken jazǵy Paralimpiada oiyndarynyń kúmis júldegeri Raýshan Qoishybaeva marapattaldy.
