Eńbek jáne halyqty áleýmettik qorǵaý ministri Serik Shápkenov múgedektigi bar adamdarǵa kútim kórsetýshilerge jańa járdemaqy qashan engiziletinin aitty, dep habarlaidy QazAqparat.
Úkimette ótken onlain baspasóz máslihatynda I toptaǵy múgedektigi bar adamdarǵa kútim kórsetýshilerge jańa járdemaqy túri qashan engiziletini týraly suraldy.
«Atalǵan máselege qatysty zańdy Senat qabyldap, Memleket basshysynyń qol qoiýyna joldandy. Aldaǵy ýaqytta qajetti zańǵa táýeldi aktilerdi qabyldaý kerek, iaǵni biz olardy daiarlap qoidyq. Meniń oiymsha, bir ai ishinde tólemdi jasaityn bolamyz. Osy baǵyttaǵy qarajat biýdjette qarastyrylǵan», - dedi Serik Shápkenov.
Budan buryn habarlanǵandai, Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine azamattardyń jekelegen sanattaryn áleýmettik qorǵaý máseleleri boiynsha ózgerister men tolyqtyrýlar engizý týraly» Zańy ekinshi oqylymda qabyldandy.
Zań jobasynyń basty maqsattarynyń biri - múgedektigi bar adamdardy, múgedektigi bar bala tárbielep otyrǵan otbasylardy, eńbek ardagerlerin jáne azamattardyń ózge de jekelegen sanattaryn áleýmettik qorǵaý jónindegi zańnamany jetildirý.
