Múgedek balalardyń baspana kezegi kámeletke tolǵannan keiin de saqtalady. Bul týraly QR Eńbek jáne halyqty áleýmettik qorǵaý vitse-ministri Erlan Áýkenov aitty, dep habarlaidy QazAqparat.
«Múgedektigi bar balalardy tárbielep otyrǵan otbasylardyń balalary kámeletke tolǵannan keiin de turǵyn úi kezeginde turý quqyǵy saqtalady. Áli kúnge deiin múgedek balalary bar otbasylar turǵyn úi kezeginde 10 jylǵa deiin turady», - dedi vitse-ministr Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, «Qazaqstan Respýblikasynyń keibir zańnamalyq aktilerine azamattardyń jekelegen sanattaryn áleýmettik qorǵaý máseleleri boiynsha ózgerister men tolyqtyrýlar engizý týraly» Zań qabyldanǵanǵa deiin eger bala 18 jasqa tolǵansha turǵyn úi almasa, onda eresek múgedektigi bar adam retinde kezekke qaita turýǵa májbúr.
«Onyń ústine birinshi nemese ekinshi toptaǵy múgedektigin alǵan jaǵdaida ǵana kezekke qaitadan qoiylady. Úshinshi toptaǵy múgedektik berilgen kezde olar baspana alý quqyǵynan aiyrylady. Endigi ýaqytta olar kámeletke tolǵannan keiin de turǵyn úi alý kezegin saqtaý quqyǵyna ie bolady. Bul norma 20 myńnan astam otbasyna turǵyn úi kezegin saqtaýǵa múmkindik beredi dep boljanýda», – dedi Erlan Áýkenov.
