Elimizdiń Bilim jáne ǵylymi ministrligi ustazdarǵa syilyq jasaýdyń zańdylyǵyna qatysty resmi túsinikteme berdi, dep habarlaidy QazAqparat.
Ministrliktiń baspasóz qyzmeti usynǵan málimetke sáikes, zań turǵysynda ustazdarǵa syilyq jasaýǵa tyiym salynbaǵan. Óitkeni, ustazdar - memlekettik qyzmetker emes.
Sondai-aq, biyl mamyr aiynda elimizdiń bas ustazy Ashat Aimaǵambetov pedagog qaýymǵa qurmet kórsetip, gúl shoǵyn syilaý sybailas jemqorlyq qaýpine jatpaitynyn alǵa tartqan edi.
«Qoǵamda ustazdarǵa gúl syilaý jemqorlyqtyń belgisi degen pikir bar. Biz onymen kelispeimiz. Osy oraida aldymen qandai jaǵdaida jemqorlyq bolyp sanalatynyn anyqtap alǵan jón. Mektep tabaldyryǵyn attaǵan búldirshin ustazyna qurmet kórsetip, gúl syilasa, ol - jemqorlyq emes», - degen edi bilim ministri BAQ-qa bergen suhbaty barysynda.
Sonymen qatar, vedomstvo basshysy bilim oshaqtarynda pedagogikalyq ádep saqtalýy kerektigin eske salyp, sybailas jemqorlyqqa jol bermeý kerektigin qatań eskertti.
Ol degenimiz - mektep qabyrǵasynda túrli syltaýmen ustazdardan aqsha jinamaý kerek nemese basshylyqqa qymbat syilyq jasaý degen sekildi dúnielerden aýlaq bolý kerek degen sóz.
Eske sala ketsek, ótken jyldan bastap elimizde memlekettik qyzmetkerge syilyq jasaýǵa jáne ony alýǵa tolyq tyiym salyndy.
