Mádeniet jáne sport ministri Aqtoty Raiymqulova memlekettik bilim berý uiymdarynyń pedagogterine sabaqtan tys sport jattyǵýyn júrgizgeni úshin qosymsha aqy beriletinin málimdedi, dep habarlaidy QazAqparat.
«Sport salasyndaǵy jattyqtyrýshy-oqytýshylardyń, muǵalimderdiń, 4 mektep-internat-kolledji men sport kolledji tárbieshileriniń, balalar-jasóspirimder sport mektebiniń jattyqtyrýshy-oqytýshylarynyń jalaqysy kóteriledi. Memlekettik bilim berý uiymdarynyń pedagogterine sabaqtan tys sport jattyǵýlaryn júrgizgeni úshin bazalyq laýazymdyq jalaqynyń (17 697 teńge) 100% mólsherinde qosymsha aqy beriledi», - dedi Aqtoty Raiymqulova OKQ-da onlain rejimde halyq aldynda esep berý kezdesýinde.
Ministrdiń aitýynsha sportshylardyń dopingige qarsy zerthanasynyń, Ulttyq dopingige qarsy ortalyqtyń qyzmetkerlerine, dene shynyqtyrý jáne sport jónindegi respýblikalyq oqý-ádistemelik jáne taldaý ortalyǵynyń, Sportty damytý direktsiiasynyń qyzmetkerleri men jattyqtyrýshylaryna laýazymdyq jalaqynyń 100% mólsherinde jańa qosymsha aqy belgilengen. Osylaisha, olardyń jalaqysy 2 ese artqan.
«Bul baǵytta jumys jalǵasady. Sala qyzmetkerlerin áleýmettik qoldaý máseleleri biz úshin árqashan da ózekti. Osyǵan bailanysty sala qyzmetkerlerin áleýmettik qoldaý júiesin odan ári damytýdy, jumysynyń ereksheligi bar mamandar úshin tólem máselesin pysyqtaýdy josparlap otyrmyz. Bul mamandyqtyń bedelin arttryyp ǵana qoimai mýltiplikativti áser beredi», - dedi Aqtoty Raiymqulova.
