Kókshetaý qalasynda mektep muǵalimi dápterin umytyp ketken oqýshylardyń mańdaiyna «Dápter» dep jazyp bergen. Bolǵan oqiǵaǵa qatysty QR Bilim jáne ǵylym ministri Ashat Aimaǵambetov túsinikteme berdi, dep habarlaidy QazAqparat.
Ortalyq kommýnikatsiialar qyzmetinde ótken baspasóz máslihaty barysynda QR Bilim jáne ǵylym ministri Ashat Aimaǵambetovke: «Kókshetaý qalasynda bastaýysh synyp muǵalimi dápterin umytyp ketken 12 oqýshynyń mańdaiyna «Dápter» dep jazyp bergen. Osy oqiǵaǵa qatysty qandai pikir bildirer edińiz?», - degen suraq qoiyldy.
«Muǵalim aldymen adamgershiligi mol jáne meiirimdi bolý kerek. Árine, bul muǵalimge tán qasiet emes, shynymdy aitsam sene alar emespin. Qazirgi ýaqytta atalǵan oqiǵaǵa qatysty tiisti sheshim qabyldandy. Osy sekildi oqiǵa qaitalanbaýy úshin shara qabyldap, aldyn alýymyz kerek. Osy turǵyda aityp ótetin mańyzdy jait, muǵalimderdiń bári birdei emes. Oqýshylardy balasyndai jaqsy kórip, tárbie, bilim berip jatqan úlgili pedagogtar jetkilikti. Ókinishke qarai, ómir bolǵan soń teris jaǵdailar oryn alyp turady», - dep jaýap berdi Ashat Aimaǵambetov.
