Búgin Ortalyq kommýnikatsiialar qyzmetinde QR IIM Tergeý departamentiniń bastyǵy Sanjar Ádilov elimizdegi tártipsizdik kezinde qozǵalǵan qylmystyq ister týraly aityp berdi, dep habarlaidy QazAqparat.
«Tártipsizdik barysynda 7 ańshylar dúkenine shabýyl jasalyp, tonaldy. Olardan 1 564 azamattyq qarý urlandy», - dedi Ádilov.
Onyń aitýynsha, Memleket basshysy lańkestik aktiler sebepterin jáne uiymdastyrýshylaryn anyqtaý boiynsha tergeýdi Bas prokýratýraǵa tapsyrdy. Osyǵan bailanysty, atalǵan sanattaǵy jáne onymen bailanysty barlyq qylmystyq ister arnaiy prokýrorlar basshylyq etetin vedomstvoaralyq jedel-tergeý toptarynyń is júrgizýine berildi. Qalǵan qylmystyq ister boiynsha tergeýdi ishki ister, ulttyq qaýipsizdik, ekonomikalyq tergeý jáne sybailas jemqorlyqqa qarsy qyzmet organdary júrgizýde.
«Osy qylmystardyń negizgi úlesin, iaǵni 70 paiyzyn nemese 1 356-sy negizinen tártipsizdikterden týyndaǵan haos protsesinde Almaty qalasynyń saýda obektilerinen jasalǵan urlyq týraly isterdi quraidy. 127 qylmystyq is atys qarýy men oq-dárilerdi zańsyz saqtaý faktileri boiynsha, taǵy 30 is olardy urlaý faktileri boiynsha tergelýde. Sonymen qatar, 63 qylmystyq is múlikti qasaqana búldirý jáne joiý, 12-si avtokólikti aidap ketý, 24-i – qaraqshylyq jáne tonaý, 23-i quqyq qorǵaý organdary qyzmetkerlerine kúsh qoldaný ári olardyń ómirine qol suǵý faktileri boiynsha tirkeldi», - dedi Tergeý departamentiniń bastyǵy.
