Mádeniet jáne sport ministrligi ókilderi sportshylar men bapkerlerge ómir boiyna tólenetin aqy nelikten kóbeietinin túsindirdi, - dep habarlaidy Tengrinews.kz.
Sportshylar men jattyqtyrýshylarǵa ómir boiy ai saiynǵy aqy tóleý qaǵidalaryna ózgerister engizý týraly joba qazir "Ashyq NQA" portalynda qoǵamdyq talqylaýda.
"Mádeniet jáne sport ministrligi qoǵamdyq talqylaýǵa qaýly jobasyn usyndy, onyń maqsaty - ai saiynǵy aqymen qamtamasyz etý tólemderin ulǵaitý, áleýmettik qoldaý kórsetý arqyly sportshylar men jattyqtyrýshylardy joǵary sporttyq nátijelerge yntalandyrý. Osy ózgeristerdi usyný kezinde kóptegen memlekettiń tájiribesi zertteldi. Resei, AQSh, Kanada, Avstriia, Shveitsariia, Ulybritaniia siiaqty birqatar eldegi qarjylyq qoldaý tetigi negizge alyndy", - dedi Sport jáne dene shynyqtyrý isteri komiteti ókilderi.
Sportshylar men jattyqtyrýshylardy ómir boiy jáne ai saiyn materialdyq qamtamasyz etý "Dene shynyqtyrý jáne sport týraly" Zańǵa sáikes respýblikalyq biýdjetten tólenetin bolady.
"Bul ózgeris qoǵamdyq talqylaý ótkizilgennen keiin 14 qazanda respýblikalyq biýdjet komissiiasynyń otyrysynda talqylanady. Eger ózgeris qoldaý tapsa, materialdyq qamtamasyz etý 2022 jyly zańdy túrde júzege asyrylady", - dedi vedomstvo ókilderi.
Eske salaiyq, keshe, 1 qazanda sportshylar men bapkerlerge ómir boiyna tólenetin aqy tórt ese kóbeiýi múmkin ekeni habarlanǵan bolatyn.
Olimpiada, Paralimpiada, Sýrdlimpiada oiyndarynyń chempiondary men júldegerlerine, olimpiadalyq sport túrleri boiynsha álem chempiony ataǵyn jeńip alǵan sportshylarǵa ai saiynǵy materialdyq qamsyzdandyrýdy 100 AEK-ke (2021 jyly 291 700 teńge) deiin arttyrý usynyldy.
Bul sportshylardy daiyndaǵan bapkerlerge 100 AEK mólsherinde tólem taǵaiyndaý josparlanǵan.
Búginde sportshylar men jattyqtyrýshylarǵa 24 AEK tólenedi - 2021 jyly 70 008 teńge.
